Ruhani: Suriyə dıvlətiku icozə nıstənə holədə ım kişvərədə xarıciyə ğıvvon huzur ğədəğəne.

İroni prezident təkidış kardə: Suriyə dıvlət və milləti vindımoni əksdə ijən çəvonku icozə nıstənə holədə xarıciyə ğıvvon huzur ım kişvərədə ğədəğəne iyən Tehron həm ımi təsdiğ kardə.

İroni prezident Həsən Ruhani zinə de Russiyə prezident Veladimier Putin telefoniyə votımonədə Suriyədə bohrani dəvom prydo karde bo hiç qılə kişvəri mənafe aid zınəş nı be və omidvar mandə ki həmmə kişvəron bə Suriyə ərazi təmamiyyət və hakımiyət ehtıromışon bıbu.

Ruhani bə Tehron, Ankara və Moskva miyono mıştərəkə əloğəon de terrorizm mubarizə barde ijən Suriyədə oromə vəziyəti bə vıcud varde işorəş kardə iyən vitışe: jıqonə həmkarion terroriston vədə detosə Suriyə millət və dıvləti kamilən bə səbarzəti rəse bəbe zumandəti dəvomış bıbu.

Ruhani Tehron, Moskva miyono əloğəonış bə inkişafi tərəf hisob kardə ijən bə 2 tərəfi mığoviləon vey rə icra karde təkidış kardə.

İroni prezident bə İroni ətomiyə təvafuği əleyh çı bəzi kişvəron xərob əkə hərəkəton işorəş kardə iyən votışe: detosə bə zəmon ki co kişvəron bəştə əhd peymonon əməl bekon İron həm hejo bəştə kiədə bıə koon əncom dodə əmmo lozime ki ım təvafuği vədə bəzi kişvəron xərob əkə siyasəton vəy qəte bıbu.

İroni prezident bə Yəməni milləti dəheştinə vəziyəti dəvom iyən bombardımon və noxşəti hevojəti işorəş kardə ijən İroniku bə Yəməni mığovimətiyə qrupon rəkıt oştoniyə qıləy təbliği və be əsosə sıxən və iddia hisobışon kardə ijən təkidış kardə ki jıqonə be əsosə iddiyaonku çı Trampi hədəf hejo ətomiyə təvafuği zəif karde çərçivədəy.

Putin həm İron və 5+1 qrupi miyono ətomiyə təvafuği vey muhimmə zınəş be və təkidış kardə: Russiyə nəzərku bo ım təvafuği zəif karde xoto har curnə cəhd bo məntəğə vəziyəti vey xətərnok hərəkəte ijən Moskva vey kərə həğiğəti bə co kişvəron xəbə dortiş dodə.

Putin bə Suriyə məsələ işorəş kardə ijən Suçi iclosi bo İron, Tırkiyə və Russiyə aid zınəş be iyən təkidış kardə: ım ki bəzi kişvəron Suriyədə terroriston silohin kardən vey niqəran əkəy boçi ki Suriyədə hərbion əvvəl bəbe çı Suriyə ya Əmniyyət Şura icozəon xıvand bıbun ijən ımi rioyət nı karde məno qıləy mıstəğilə kişvəri daxıli mıvzoon mıdoxilə karde mənodəy.

Russiyə prezident çı Yəməni milləti vəziyəti vey niqəran əkə zınəş be iyən bə ım kişvər oromtəti oqordoniyəro bə həmmə kişvəron tərəfo solhinə roon icra karde təsdiğ kardə.

Putin İron və Russiyə miyono çı ozod ticariyə məntəğəon Avrasiya təşkilati çərçivədə icod karde bardehəm xəbəş do ijən təsdiğ kardə ki mığoviləon imzo bey bəpeştə 2 qılə kişvər bə tojə dıvrə həmkarion varid bə ben.