Şeyxulislam Hacı Allahşukur Paşazadə polisi ğətl kardəkəson kofir hisob kardışe

Qəncə hadison hələən Az.R ictimaiyyəti ən vey muzakirə kardə mevzuey. İyuli 10-də mitinqi vaxti polisə zabiton kıştə ğatilonədə qıley- Rəşad Beyukkişiyev 3 ruji bədiqə Samxor rayoni Moranlı diədə polison de qolulə jeşone, kıştışone.

"Azadlıq.info" nıvıştedə ki, polison ım qonə cinayətə əməli qınokarə ğatili bəpe bəji dəstqir bəken ki, ımi təhğiğ karde, çey təşkiləkon bə oşko bekarde hoson bıbo. Hadisə əsasə iştirakəkə, həmən şohidi ğətl karde, bı koədə vey şubhon bə əməl vardedə.

De Qəncə hadison əlağədar Respublika huğuğə muhafizə orğanon 12 nəfər dəstqir karde bardə məlumat doəşonbe. Tosə iyulə manqi 14- minə ruji əlavən 3 nəfər dəstqir kardə bıə. 5 nəfər de bı hadisonədə iştiraki ehtimali Azərbaycan Rusiya marzi ovaşteədə oqətəşone. Əlavə bə 2 qılə sayti - "gununsesi.info" və "teref.info" sayton rəhbəriyyəti əleyh cinayətə ko bino kardəşone. Bə terrorə hərəkəton dəvət ittihami 21 nəfəri əleyhən çinayətə ko bino bıə, çəvon arədə siyasiə muhacironən hestin. Bə 25 nəfəri munasibətədə inzibnatiə zindonə cəzo muəyyən kardəşone.

Şeyxulislam Hacı Allahşukur Paşazadə de Qəncə hadison əlağədar ıştə fikir bəyon kardəşe. Votəşe ki, islamiə dinədə bo terrorə hərəkəti vırə ni. İslamiə din insonon arədə sulh, bıyəti, dəyanət, dustiəti dine. İnsoni ğətl karde, bə Xıdo əleyh ğiyame, jıqo odəm kofire.