Əliyevi hokumət rusum və cərimon məbləğ ziyod kardışe
Nati ğıyməti erjon bıə vaxtonədə İlham Əliyevi hokumət devləti budcə nırəsəy bə sodə zəhmətkəşon hisob pur kardə siyasət bino kardışe. İsət beynəlxalğə birjadə 1 barel nati məzənnə 70 dollarisən dəvardə. Devlətə budcədə defisiti çe arəku barde mumkun bıə vaxtədə hokumət ıştə kanə siyasəti - devləti rusum və cərimon ziyod kardə əməlon dəvom kardedə.
"Milli.az" sayt xəbə dodə ki, çe iyulə manqi 17-ku etibarən avtomobil rome vəsiqon, avtomobili ğeydiyyatə şəhadətnamə se və ya əvəz karde ro devlətə rusumi məbləğ təğribən 50 % ziyod kardəşone. Tosə ısət bə ım koy qorə devlətə rusum 17 mənot bıe, çimi bəpeşt avtomobili soybon və əromon bımi ro 25 mənot rusum avjor kardənin bəben.
Bə piyodə odəmon tətbiğ bıə cərimon miğdarən ziyod kardəşone. De ım məğsədi Prezident Əliyevi bə İnzibati Xətoon Məcəllə muvafiğə əvəzon təsdiğ kardəşe. İsət piyodə odəm avtomobilə roy ovaştə ğaydon darışte təğdirədə 40 mənot cərimə doənin bəbe. Tosə ısət ım cərimə məbləğ 20 mənot bıe.
De jıqo sərt budcə tədbiron bərobər İlham Əliyev bə budcə vəsaiton hisob tojə devlətə təşkilaton onodə. Az.R Rəğabət Aqentiyyəti soxte barədə Prezidenti fərmani layihə hozo karde həxədə "APA-Economiks" sayti məlumat doəşe. Ğeyrəz ımi de prezidenti sərəncomi Maliyyə Monitorinq Xidməti təşkilatən sənibəton onoəşone. 2016-minə sori yanvarədə Əliyevi de hokuməti ixtisar karde məğsədi ım təşkilat ləğv kardəşbe.
