Avropa təşkilati Az.R-ədə işqəncon təsdiğ kardə hesabat elan kardlşe

Çe Avropa Şura bə İşqəncon Əliyh Komitə hestışe. Im komitə uzvon 2004-minə soriku tosə ısət bə Az.R de işqəncon əlağədar 8 kərə səfər kardəşone. Isət əvon ıştə ım səfəron nəticə, həmən Boku hokuməti bə çəvon parseşi doə cəvobon bə cəmiyyəti nəzə rosniəşone.

"Azadlıq.info" bı barədə nıvıştedə ki, Komitə hesabati ğıssə məzmun jıqoe ki,  Az.R huğuğə-muhafizə orğanon və ərteşədə işqəncə, bədrəftori həmə holon, həmən korrupsiya və becəzoəti rəvoc səşe, ım vəziyyət ısətən dəvom kardedə. Məhbuson de vəkil və tibbi xidməti, huğuği qarantiyon təmin nıbe problemon hələən həll bıəni.

Sulh və Demokratiya İnstituti Direktor Leyla Yunusi bə Meydan TV votəşe ki, Az.R huğuğə muhafizə orğanonədə dəhşətavərinə işqəncon həmişə mevcud bıə, ısətən mevcude. İqlə dəvardə sori ım orğanon məskun bıə otağonədə  8 nəfər çe işqəncə səbəbuku tələf bıən. Diqər işqəncə faktonku xəbə qəte mumkun bedəni, çunki hokumət ıştə ım ğeyri-ğanuniə hərəkətoku xəbə qəte imkan dodəni. Ey ğeyd kardəşe ki, ım hesabat Respublika orğanonədə bə işqəncon orəx nibədo bə səbəb ki, bım işqəncon çe penə vəzifədaron tərəfo rəvoc və icazə dodən. Hejo çimi nəticəy ki, tosə ısət bə işqəncə doe qorə hiç kəsşon tanbeh kardəni. 

 Nardarani məhbus Abbas Huseyini de işqəncə əlağədar bə məhkəmə doə şikayət hakimi rədd kardəşe. Diqər siyasiə məhbus Ğiyas İbrahimonvi moə Şura Əmiraslanovaən dəvardə rujonədə bə Qiyasi zindonədə işqəncə doe həxədə bə ictimaiyyəti xəbə rosnişe.

Əmo Ədliyyə Vəzarəti Penitensiarə xidməti rəsmiyon  daima işqəncə fakton təkzib kardedən. Bə Avropa Komitə ım hesabati isə Boku hokuməti hələ ki, rəsmi cəvob doəş ni.