Zindonxonədə dini məhbuson vəziyyət qone

Dini xadim Hacı Abqul Suleymanov 2011-minə soriku zindonədəy. Ey zindonxonə məhbuson arədə nufuz və hurmət ğəzənc kardəşe. Xeyli məhbuson bə din ome, nomoj voteədə Hacı Abduli yolə rolış bıə.

Bı səbəbən Penitensiarə xidməti 3 həftə çimi bə nav çey vırə əvəz kardışe, əvış bə 2 numrəninə zindonxonə vığande. Im muəssisə rəhbəriyyəti Suleymanov oməcəğin bey 15 sutkəninə karser cəzo doəşe. Hacı nezə odəmon bə həmonə zindonxonə şən, çəvrey mudiriyyətiku çimi səbəb xəbə səşone, mudiri muavini bəvon votəşe ki, Hacı Abquli ıştənış cok bardəni, bə qorə əv bə karser dənoəmone. Im xəbə "İslamazeri.com" sayti bə əhandon nəzə rosniəşe.

Nardarani hadisə məhbus Cahad Babakişizadən 12 numrəninə zindonxonədə bə karserə cəzo məruz mandə. Çey nezə odəmon xeyli vaxte ki, dey rabitəşon ni. De co məhbuson vasitə xəbə qətəşone ki, Cahadi səhhət qıvonine, əvşon bı vəziyyətədə bə karser dənoə.

Babakişizadə nezə odəmon bə Penitensiarə Xidməti muraciət kardəşone. Əyo bəvon votəşone ki, norohət nıbon, Cahad i ruji dılədə bə kə zanq bəkarde. Əmo ım votəy bə du beşə, Cahadiku xəbə oməni. Əvon bə 12 numrəninə cəzokəşə muəssisə zanq kardəşone, çəyoən bəvon məğbulə cəvob doəşon ni.

Cahad Babakişizadə de Nardarani hadison əlağədar 2015-minə sori noyabri 26-ədə dəstqir bıə. Məhkəmə əvış bə 14 sor 6 manq muddətinə zindonə cəzo məhkum kardə. Isət  xeyli vaxte ki, cey de kədəkion rabitəş ni. Əvlodonış cey vəziyyətiku xeyli norohətin.