Boku hokumət dini fəalon tələf kardedə.

Az.R huğuğə muhafizə orğanon de Qəncə hadison əlağədar i nəfər dindarşonən ğətl kardə.

"Azadlıq.info" bə APA aqentiyyəti istinadən ım hadisə təfsilati bə əhandon nəzə rosniəşe ki, Ağa Huseyni zoə Sərxani bə polisə ğıvvon silahinə muğavumət nişon doe səbəbiku de qolulə jəşone. Hokumət jıqo qıley məlumat doəşe ki, quya Ağa Sərxani bə Elmar Vəliyevi sui-ğəsdədə iştirakış hestebən. De Yunis Səfərovi ın ğəsdi plan hozo kardəşebən. Bı cinayətə əməli qorə hokuməti əv bə axtarış doəşebən.

Məlumatədə həmən ğeyd kardəşone ki, əv mutəmadi bə İron sedəbən, quya 2016-minə sori Suriyadə musəlləhə qruponədə təlim dəvardəybən. Hokumət Sərxani kom məntəğədə tələf karde barədə məlumat dodəni. Əmo çey çand qılə foto bə cəmiyyəti edaştəşe. Bı şikilonədə çey İronədə ziyarət, muxalifəti mitinğədə çe Taleh Bağırzadə portret ros karde və çey şəhid kardə bəpeşt dastədə həfttir əks bedə.

AXCP sədr Əli Kərimli bə ım ğətli etiraz kardəşe, votəşe ki, ım çe Respublika huğuğə muhafizə orğanon nubətinə ğətl əməle. Hokumət bəpe etiraf bıko ki, ey ım 3 nəfər ki, de Qəncə hadison əlağədar ğətl kardəşe, əvonış ğəsdo kıştə. Çunki, polisə ğıvvon ım odəmon tərksilah karde ro hiç qıley cəhd nişon doəşon ni. Çe Ağa Sərxani fotoədə oşko vində bedə ki, həfttir əv ğətl kardə bəpeşt bə çey dast noəşone. Im soxtəkarəti kardə odəmon anədə kolhındin ki, Ağa Sərxani əslən cəpili bıə, əmo həfttir bə çey rosə dast noəşone.

Hokuməti orəxnə hərəkəton subut kardedə ki, əv məhərrəmə manqi ərəfədə bə şiə fəalon divon qəte ro Elmar Vəliyevi de qolulə je əməliku bənə vonə istifadə kardedə. Ey de dini fəaion tələf karde roy Əhil-Beyt (ə) tərəfdaron torsınie, cəvon məhərrəmə manqi əzadarəti əzəməti bə kam karde nısığ hestışe.