Az.R-ədə Mətbuatə ruj ğeyd kardışone

143 sor bə nav, 1875-minə sori iyuli 22-ədə Həsən bəq Zərdabi "Əkinçi" nomədə rujnomə nəşr kardışe. Isət ım tarix har sor Az.R -ədə bənə Mətbuatə ruji ğeyd bedə. Prezident İlham Əliyevi ım idi ərəfədə bə məmləkəti hokumətpərəstə rujnomon 1 milyon mənot məbləğədə komək kardışe.

Tosə ısət Boku şəhərədə bo jurnaliston 2 qılə veyəmənzilinə bina inşa kardəşe 300 nəfərisən vey mətbuatə xadimon de həvoyə mənzili təmin bıən. Vəomə soronədə 3-minə jəqo bina bə jurnaliston istifadə bədon.

Əmo Respublikadə azad mətbuat və sıxanə azadi vəziyyət hiçən bə devləti Konstitusiya tələbon muvafiğ ni. Imən bə muxalifəti və beynəlxalğə təşkilaton norohəti səbəb bedə. İlham Əliyevi de Fransa prezident  Emmanuel Makroni vindemoni bə nav "Bemarzə Reportyoron" təşkilati bə Avropa lideron muraciətən bəyon kardışe ki, İlham Əliyev bə mətbuatə azadiəti prinsipon riayət kardedəni, mustəğilə, azad fikrinə jurnaliston təğib kardedə. Haliyədə 11 nəfər jurnalist və 2 nəfər bloqqer zindonədə cəzo kəşedə. Bə Mətbuatə Azadi dair beynəlxalqə indeksədə Az.R 180 qılə devləton arədə 163-minə vırədə ğəror qətedə. Im təşkilat Avropa lideron dəvət kardəşe ki, de Boku ıştə munasibətonədə çey vədə bəştə ehdə peğətə beynəlxalğə təəhhudon əməl, zindonədə bıə jurnaliston azad karde, bə mustəğilə mətbuati təzyiğ və təğibon orəx doe şərton bə nav bıdon.

"Azadlıq.info" de Mətbuatə ruji munasibəti çe jirnalist Revşən Hacıbəyli bə Prezidenti muraciət dərc kardəşe, hokuməti bə azad mətbuati munasibəti barədə xeyli fakton misal vardəşe. Muraciəti orəxədə bey votəşe ki, "ım məktubi nahandoyonən bəbe, çunki şımə ımoni həmə zınedəyon".

Əlavən vote lozime ki, Əliyev hokuməti bə Respublika xalqon zıvonədə beşə mətbuati munasbətən jıqo neqative. İqlə ım fakti nişon doe kafie ki, "Tolışi sədo" rujnomə redaktor Hovruzəli Məmmədov zindonədə vəfat kardışe, diqər redaktor Hilal Məmmədov 4 sornə zindonə cəzo kəşəşe, 3-minə redaktor Rafiğ Cəlilov 2 kərə de məhkəmə ğərari bə inzibati cəzo məhkum bıə.