Bə Yunis Səfərovi vəkili dey vindemon karde imkan dodənin
Polisi Yunis Səfərov iyulə manqi 3-ədə Qəncə icra sərdari de qolulə je ittihami bə zindon dəğandəşe. Çə vaxtnəku tosə ısət hokumət nə bə çey nezə odəmon, nəən bə vəkili dey vindemon karde imkan dodəni.
İ kərə, yəni bə Yunisi işqəncə doe barədə bə dınyo cəmiyyəti xəbə rəse bəpeştə, Boku hokumət ıştəni bə sofi bekarde ro əvış televiziya ekranədə nişon doe, ey hətto de vəkili təmin kardeyən bə ictimaiyyəti nəzə rosnişe. Əmo hokuməti humanistəti, bəştə şəhrıvandon huğuğon hurmət kardə əməl de ımiən orəxe. Isət çand vaxte ki, Yunisi nezə odəmon və vəkilon bə hokuməti muvafiğ orğanon muraciəton vığandedən ki, hiç nıbo Yunisi kom təcridxonədə oqətə vırə barədə məlumatşon bıbo.
Bə rəsmi məlumaton əsasən de Qəncə hadison əlağədar 30 nəfər dəstqir kardəşone, əmo tosə ısət həmonə məhbuson nezə odəmonədə hiç kəs nə dəvon vindemon karde imkanədə, nəən həmonə dəstqirbəkəson vəkili tərəfo de mudafiə təmin bıənin.
Nəhayət xeyli muraciəton bəpeştə bı rujonədə Sər Prokuroturaku bə Meydan TV parsi cəvob doəşone ki, Yunis Səfərov və de çey koy əlağədar dəstqir bıə odəmon Daxili Koon Vəzarəti de Mutəşəkkilə Cinayəton Mubarizə İdarədə təhğiğati jitono oqətə bedən. Bə həmonə idarə xalqı arədə "Bandotdel" votedən. Nardarani faciə məhbusonən əyo bə ğeyri-insoniə işqəncon məruz mandedəbin.
Qəncə hadisə məhbuson nezə odəmon bə çəvon vindemoni imkan nıdoe səbəbi əvoni bə işqəncə məruz mandedədə vindedən.
