Mısılmonon İbemonə Hərəkati bəyonat doəşe

Devləti Əmniyyətə Xidməti xususiə əməliyyatə dastə iyuli 28-minə ruji Samux şəhərədə Səmədov Fuad Tofiği zoə kıştəşe. İm xəbər "Sputnik-Azərbaycan"i bə "Trend.az" sayti istinadən pevolo kardəşe.

Əyo votə bedə ki, Fuad Səmədovi Qəncə iğtişaşonədə iştirakış hestebən. Ey dəstqir kardə əməliyyatədə de "Makarov" markaninə həfttiri muğavimət nişon doe səbəbiku, əv əməliyyatə dastə tərəfo tələf kardə bıə.

Səmədov de Qəncə hadison əlağədar huğuğə muhafizə orğanon tələf kardə 4- minə odəme.

Çimi bə nav əvon MİH fəal Sərxani Ağa Huseyni zoə ğətl kardəşonbe. De ım hadisə, həmən hokuməti Qəncə hadison bə ım Hərəkatı obaste cəhdi əlağədar MİH bəyonat pevolo kardəşe, bə Respublika cəmiyyəti nəzə rosniəşe ki, Qəncə hadisonədə çəmə hərəkati qınokar zıne hiç qıley əsos nişe, Ağa Sərxani ım hərəkati fəalonədə bıe. Hokuməti ey ğətl kardeədə məğsəd bənə Nardarani hadisə ğəzinə Respublika cəmiyyəti arədə xof bə əməl varde, bə MİH şər və bıhton ğandeye.

Niderlandə Kralətiədə Yunis Səfərovi Mudfiə Komitə de Az.R devlətə orğanon ğətlkarə əməlon əlağədar etirazə bəyonat bə çəmiyyəti nəzə rosniəşe. Komitə uzvon hokuməti Fuad Səmədovi və de ım roy həniən 3 nəfəri kışte devlətə terrorə əməl hisob kardedən. Əvon ğeyd kardedən ki, ə şəhrıvandon ki, huğuğə muhafizə orğanon tərəfo kıştə bıən, hətto qınokarən bıbon, əvoni  beistintağ və bemuhakimə tələf karde devlətiə cinayət və hokuməti bə şəhrıvandon munasibətədə terrorə əməle.

De bəyonati tam mətni Yunis Səfərovi Mudafiə Komitə sədr Əliəkrəm Hummətovi "fasebook" səhifədə oşno bıe mumkune.