Az.R-ədə səhiyyə sistemi problemon

Az.R səhiyyə sistemi nırəsəyon həxədə məmləkəti KİV vey nıvıştəşone, əmo ım mışğılon nəinki çe arə barde mumkun bedəni, əvon həniən nığıl bedən.

"Azadlıq.info" bə Boku sakin Esmira Cavadova sə omə hənqomə barədə bəştə əhandon xəbə rosniəşe. Cavadova bə ım sayti muraciətən nıvıştəşe ki, çey pıə xırtəyo xun ome səbəbiku bə Təcili Tibbiə Koməki zanq kardımone. Əvon omin noxəşinşon bə 3 numrəninə Mərizxonə barde pişone. Əmə etiraz kardımone, bə səbəb ki, ım mərizxonədə beetina munasibəti səbəbiku xeyli noxəşinon vəfat karde zınedəbimon. Bə co mərizxonə barde xahiş kardımone, əvon votışone ki, bımi ixtiyar nimone, noxəşini bə şımə jimon kardə ərazi mərizxonə bardəninimon. Məcburən rozi bimon. Həmonə mərizxonə cərrahiyyə şebə çəmə noxəşin ğəbul nıkardışe, vığandışe bə terapiya şebə. Əyoşonən ğəbul nıkarde, votışone bobən bə Buzovna 7 numrəninə Dispanser. Noəloc mandimon bə Səhiyyə Vəzarəti mətbuatə xidməti zanq kardımone. Çəğono bə nevbətçiə doktori dəstur doşone ki, noxəşini ğəbul bıkon. Əvmon sənibəton bə cərrahiyyə şebə barde. Bı səfə bəmə votışone ki, noxəşini bobən bə Sipiəciqər İnstituti. Əmə bəvon  votımone ki, çəmə pıə əyo tojə çe muayinəku dəvardə, çey sipiə ciqəron salemin. Axır ki, məcbur mandimon ıştə noxəşinə pıə oqırdınimone, vardımone bəştə kə.  

Esmira Cavadova həmonə mərizxonə doktoronku bə məhkəmə şikat karde fikir hestışe.

Avqusti 2-minə ruji Lankoni Mərkəzi Mərizxonə zande şebədə cıvonə moə de tojə bə dınyo omə korpə tələf bıən.

"Press-az.com" saytən Natəçolə Mərkəzi Mərizxonədə doktoron səhlənkarəti səbəbiku tojə bə dınyo omə hırdəni marde barədə xəbə doəşe.