Boku şəhəri inkişafi sər plani hozo kardedən
Bə prezident İlham Əliyevi dəsturi əsasən Devləti Şəhərinşa və Arxitektura Komitə Boku şəhəri inkişafi sər plani hozo kardə tədbiron bino kardəşe.
"İslamazeri.com" bə ım Komitə istinadən xəbə dodə ki, ən muasirə təcrubəku istifadə karde ro dınyo məşhurə “The Boston Consulting Group” bı ko cəlb kardəşone.
Devlətə Komitə de ım şirkəti bahəm Boku şəhəri inkişaf plani 2 mərhələdə təşkil bəkarde. Sıftənə mərhələdə tosə ısət bo paytaxti inşa ro hozoə sənəd və layihon təhlil, əvoni de dınyo muasrə devri urbanizasiya tələbon muğayisə karde nəzərədə qətə bıə. Bı mərhələdə tarixi abidon muhafizə, muhəndis kommunikasiya, sosial infrastruktur, ekoloqiya problrmon həll kardə layihon hozo bəkarden.
Dıminə mərhələdə de "Boston Konsaltinq Qrupi" bahəm dınyo nufizinə memar, muhəndis, inşaat eksperton bə həmkarəti cəlb karde roy Boku sər plani hozo karde bə orəx rosniə bəbe. Devləti muvafiğə orqanon roziyəti və cəmiyyəti tərəfo muzakiron bəpeştə həmonə plani bə Haziron Kabinet təğdim bəkarden. Cey təsdiği bəpeşt 20 sori dırozi ım plani bə jimon dəvunie nəzərədə qətə bedə.
Prezident Əliyevi de ım plani hozo karde əlağədar tədbiron icra, xarici mutəxəssison bı koy cəlb karde ro ıştə ehtiyatə fondiku 4 milyon mənot vəsait co kardəşe.
Azadi Radio bə yod vardedə ki 2015-minə sori devləti muvafiğə təşkilaton Boku inkişafi sər plani layihəşon hozo kardəbe, bə Naziron Kabineti edaştəşonbe. Əmo peşo çə planiku hiç qıley soəx benışe.
