Tırkiyə bə Amerkə xəbədoəti doşe ki tojə siyasəton əvəzi bebəşe.

Tırkiyə xarıci vəzarətxonə, ım kişvəriku bə Amerkə pulo və aluminium varid karde tarifon ziyod karde barədə təhdidış kardə ki çı Amerkə ım siyosəton vədə minosibə reaksiya nışo bədoy.

Bə Royterz raporti əsos, Tırkiyə xarıci vəzarətxonə zinə qıləy bəyoniyədə ım kişvəriku bə Amerkə pulo və aluminium varid karde tarifon barədə elanış kardə: Tırkiyə həm Amerkə tojə ğəroli vədə revanşistə hərəkəton əncom bədoy.

Tırkiyə vəzarətxonə təsdığış kardə: Amerkə təziğon və sanksiyaon fəğət bə 2 qılə kişvəri rabitəon zərər bəjəne və ixtilof de diplomatiyə bəhson, xəymandəti iyən 2 tərəfiyə sərəse həl bəbe.

Tırkiyə xarıci vəzarətxonə bəyoniyədə ijən omə ki: de dınyo ticariyə təşkilati ğanunoni bərobər bə pulo və aluminium tarif oko doe, çı dınyo ticarət ğanunon ləğv iyən dəqordıniye hisob bıdə.

Amerkə prezident Donald Trump zinə, Tırkiyəku bə ım kişvər pulo və aluminium varid karde tarifi 2 bərobərış kardə.

Amerkə dəvardə haftə həm bə çəy xoto ki Tırkiyə Amerkəvıjə kişişi(Tırkiyədə dəstqir bıə) Andre Brunsoni ozod kardeyku imtinoş karde, bə Ərdoğani kabineti 2 qılə vəziron sanksiyaon okoş do.

De Amerkə siyasiyə cəhdon, Tırkiyə milliyə pul "Lirə" ımsor 35 faiz Amerkə dollari vədə çı erjku kam be və zinə bəştə vey kamə miğdor rəsə.

Tırkiyə millət məxsusən ım kişvəri prezident Rəcəb Təyyeb Ərdoğani tərəfdoron nəzəriku Tırkiyə milliyə puli bıhron, bo Tırkiyə zəif kardeyro Amerkə cəhdon nışo dodə.