İİR və Az.R arədə ticari əlağon İnkişaf kardedə

Ironiku bə Az.R daxil bıə ixracatə ticari məhsulon bə ponə sori nisbətədə 70% ziyod bıə.

"Maide.az" bə İSNA aqentiyyəti istinadən xəbə dodə ki, İron - Az.R muştərəkə ticari muəssisə sədr Bəhruz Poosuleymani votəşe ki, 2018-minə sori marti 21-ku tosə iyuni 21 İroniku bə Az.R 14 milyon dollar məbləğədə məhsul idxal bıə ki, ımən bə ponə sori eyni devri nisbətədə 6 milyon dollar veye. Ponə ım 3 manqədə 16 həzo ton, imsornə həmonə devrədə isə 40 həzo ton vəznədə məhsul idxal kardə bıə.

İroni tərəfi Az.R de İroni ərazi bə Ğətər vığandə məhsulon səpe tranzitə rusum ləğv kardəşe. Bı həxədə Respublika Devlətə Avtomobilə Nəğliyyatə Xudməti rəisi muavin İbrahim Əliyevi məlumat doəşe, votəşe ki, tosə ısət Azərbaycano bə Ğətər çe İrono dəvardə har tranzitə bokırniə maşini avjor kardə rusumi məbləq 600 dollar bıe. İron-Azərbaycan muştərəkə komissiya iclasədə həmonə rusumi ləğv karde barədə ğəror doşone.

Az.R Devlətə Statistika Komitən elan kardəşe ki, 2018-minə sori sıftənə 6 manqi muddətədə azərbaycanıjon ən vey səfər kardə məmləkət İİR  bıə. Həmonə vaxtədə çe məmləkəto bə İron 580 həzo azərbayçanıjə şəhrıvandi səfər kardəşe. İmən çe keşvəro bə xaric səfər kardəkəson 28 % təşkil kardedə. Azərbayçanıjon ən vey səfər kardə 2-minə keşvər Rusiya 21%, 3-minə keşvər isə de 12%-i Turkiyəy.