De Qəncə hadison əlağədar polison i nəfərşonən ğətl karde
Dəvardə rujonədə DKV əlahidə əməliyyatə ğismi Qəncə hadisə iştirakəkonədə qıley - Rəhimov Muraz Capayi zoə həlok kardəşone. Im Qəncə şəhəri sakin axtarışədə bıe.
Polison əv Sumğayitədə peydo kardəşone. Rəhimovi quya bəvon silahinə muğavimət nişon doəşe. Bə polison təslim bıe əmri tabe bıəni, bı səbəbən əvşon tələf kardə. Çey səpe qıley həfttir və sursat bə oşko bekardəşone. İm xəbə bə "Musavat.com"i istinadən "İslamazeri.az" sayti bə əhandon nəzə rosniəşe. De ım fakti de Qəncə hadison əlağədar polison tərəfo tələf kardə odəmon miğdar bə 5 nəfəri rəsə.
Az.R ərteşədə sərbazon tələfatən dəvom kardedə. Bı səfə ğətl bıəkəs Əbilov Fəhmin Akifi zoəy. Əvşon 4 manq bə nav çe Liki şəhrıstoni Kıncəvo diyku bə hərbiə xidmət bardəbe . Ərteşi rəsmiyon elan kardəşone ki, ey ıştənış de qolulə jə. Əmo Akifi odəmon tabut oj kardəşone, çey bədənədə xeyli işqəncə rizon vindəşone."Meydan TV" ım hadisə ifşakardə video-kadron bə Respublika ictimaiyyəti nəzə rosniəşe. Sosial şəbəkonədə tolışə fəalon hokuməti ım beysurə siyasət məhkum kardəşone. Ozodə Tolışıstoni Vindəsədo Televiziya, Tolışə Muhacirə Hokumət Az.R ərteşədə jiqo beaburinə hərəkəton dəvom karde, bı çinayətkarə əməlonədə iştirak kardəkəson becəzo mandeku ıştə norohəti ifadə kardəşone. Mərhumi odəmon çey cənazə bə Boku bardəşone ki, çe ekspertizayo dəvunon.
Respublika Mudafiə Vəzarəti rəsmiyon de ım beaburinə fakti əlağədar hələ ki, hiç qıley məlumat bəyon kardəşon ni.
