Məktəbhandon olimpiada ğalib beynəlxalğə musabiğatiku kənoədə mande

Az.R Təhsil Vəzarəti dəvuniə ımsornə "Məktəbhandon II robot olimpiada"ədə X sinifi şagird Yasin Ğuliyev ğalib beşə, çey soxtə roboti 1-minə vırə qətəşe. Əv bəpe Meksika "First Global" beynəlxalğə robot texnika musabiğatədə Az.R təmsil bəkəy. Im musabiğati nufuz çımədə zınə bedə ki, əyo 160 qılə məmləkəti numayəndon iştirakşon hestbe. Avğusti 15-ədə bino bıə həmonə tədbirədə Yasin Ğuliyevi iştirak mumkun nıbe.

Çey pıə Yalçın Ğuliyevi bə "Yeniavaz.com" sayti votəşe ki, Yasini həmonə musabiğatədə iştiraki maddi dastək doe ro bə Nəğliyyat və Barzə Texnoloqiya Vəzarəti muraciət kardımone. Vəzarəti numayəndə ome bə roboti nəzərış səğande, bəqəm kardışe. Çəyo bo musabiğati bino bıe kamə rujon mandə Vəzarətiku bəmə çəvob ome ki, bəs " çəvon təşkilati bə ım koy maliyyə co karde ro imkan nişe".

Yalçın Ğuliyevi ımən ğeyd kardəşe ki, Yasini bə musabiğatədə iştiraki ro təğribən 3500 dollar pul lozim bıe. Az hətto 2500 dolları ıştə cifo xarc kəşe rozi bim, xahiş kardıme ki, Vəzarət hiç nıbo 1 həzo dollar komək bıko ki, ıştə devləti jıqo musabiğatədə təmsil karde bızınəmon. Əmo ım mumkun nıbe.

Imiən vote lozime ki, Yasini diğər həmroon deştə xarci həmonə musabiğatədə iştirak karde ro bə Meksika dəro qıniən.