Hışki bə Subtropikə məholi di təsərrufati ziyan jəşe

İmsornə hışki bə Az.R Subtropikə məholi di təsərrufati xeyli ziyan jəşe. “Sputnik Azərbaycan” sayti muxbir Lankon və Hostoro rayononədə de çayəvonə təsərrufati koəkon vindemon kardəşe.

“Astaraçay” MMC Hırkon təsərrufati rəis Şəhadət Mahmudovi votəşe ki, İyul – avğustə manqonədə çayə kulon bə ovi tələbatşon vey bedə, bə qorə bəvon vaxti-vaxtədə ov doe lozime. Əmo ımsornə vəziyyət hicən fərəhbəxş ni. Ovi nırəse səbəbiku çayə kulon sutedən. Ponə sori tosə iyulə manqi 100 ton çayə livə qırd kardəmonbe. İm sor bə həmonə miğdari rəse zınənimon. Xımbəloni ovə amboədə ovi kam be ımsornə meliorasiya koon xeyli bə mışğıl eğandəşe.

Penə Xımbəlonə Hidroşəbəkə İdarə rəis Allahyar Salayevi bo muxbiri qəp jəşe ki, ım sor bə Xımbəlonə ovəambo cəmi 29 mln. kub metr ov qırd karde zınəmone. Hərçənd ki, ambo həcm 52 mln. kub metre. Çimi səbəb im sori dırozi voş-vəşə miğdar bə dəvardə soron nisbətədə kam beye. Haliyədə amboədə cəmi 6 milyon kub metr ov mandə. Əqər bə nəzər bısənəmon ki, Lankon şəhəri əhaliən de peşomə ovi əmə təmin kardedəmon ımsornə ovi nırəsəy miğdari təsəvvur karde bəzınemon. Çəmə ovi əsasə mənbə Vazərue ki, çeyku ovə sərfiyyat ısət bə 0.5 – 0.8 kub metri ğədər saru eqıniə. Vəhalinən dəvardə soron iyul-avğustə manqonədə ım rəğəm 1.5-2 kub metr əbi.

Salayevi əvşən ğeyd kardə ki, ayəndə soronədə jıqo mışğılon vəy se ro ovə kanalon təmiz karde, tojə kanalon okırnie, tojə ovə mənbon bə istifadə doe çəmə, həmən Lankoni rəhbəriyyəti vədə mandə əsasə vəzifonədə bənine.

In problemi co qıley səbəbşən heste. Əvən çımədə ibarəte ki, Tolışə vişon sərasər ance, Tolııstoni rutubətinə subtropikə iğlım əvəz kardəşe. Isət bı məholədə rutubəti muhafizə kardə beməyə sərpuş həni mandə ni. Rutubətə subtropikə həvosatən de hışkə iğlimi əvəz bedə.