Az.R-ədə Ğıbonə id ğeyd kardışone

Avğustə manqi 22 Az.R-ədə Ğıbonə idə ruje. De ım idi əlağədar hokuməti məmləkətədə 2 ruj - manqi 22 və 23 -minə rujon tətil elan kardəşe.

Avğusti 22-minə ruji məçitonədə Ğıbonə idi nomoj votəşone. Tojəpir məciti nomojədə Ğəfğaz Mısılmonon İdarə sədr, şeyxulislam Hacı Allahşukur Paşazadə iştirak kardəşe.

Prezident İlham Əliyevi, həmən Azərbaycani İslamə Partiya sədri əvəz Hacı İlhami de ım idi munasibəti mısılmonon təbrik kardəşone.

Qurcistanədən ım id devləti səviyyədə ğeyd kardəşone. "İslamazeri.az" sayt xəbə dodə ki, Qurcistani Sər vəzir Mamuka Baxtadze bə Tiflisi  "Cumə" məçit omə, bə Ğıbonə idi həsr bıə tədbiri umjən qıniə, ıştə təbrikə votemonədə ğeyd kardəşe ki, "Ğıbonə id insonon arədə sulh, vəhdət, dustiəti təbliğ kardə qıley tarixiə ənənəy. Əv həmən bə becizə, ehtiyacinə odəmon komək karde ro şərait bə əməl vardedə." 

Çəyo Qurcistani bə Dini Məsələon dir Devlətə Aqentiyyəti sədr Zaza Vaşakmadze devləti bə dini doə dastək və koməki barədə votemon ehandışe. Qurcistani Mısılmonon İdarə şeyx Hacı Ramin İgidov, Ğərbi Qurcistani mufti Hacı Beqlar Kamaşidze, Şərği Qurcistani mufti Hacı Yasin Əliyeviən mısılmonon təbrik kardəşone.

Bı tədbirədə Az.R, Ğəzəxıstan, İİR, İrağ, Türkiyə və həniən diqər mısılmonə devləti səfiron və səfarəti numayəndon iştirakşon bıə.