Boku hokuməti Məhərrəmə manqi əzadarəti səpe məhdudiyyət noəşe
Məhərrəmə manqi əzadarəti dınyo məmləkəton muxtəlif məntəğonədə har sor ğeyd kardedən, Əhli – Beyt(ə) aşiğon bə İmom Huseyn(ə) və Kərbəlo şəhidon ıştə ehtirami ifadə kardə matəmə məclison onodən.
“Maide.az” bə “Deyerler.orq” sayti istinadən Avstriya paytaxt Vayana şəhərədə İmom Əli (ə) nominə İslamiə Mərkəzədə mısılmonon matəmə məclis dəvuniəşone. İroni Ğum şəhəri imom cumə Ayətullah Seyid Haşim Huseyni Buşəhri həmonə məclisi mehmon bıə, iştirakəkon de çey inoməti nomoj votəşone. Çəyo Əhli-Beyt (ə) ım yolə alimi xutbə votəşe. Məclisədə rozəxan və mərsiyəxanon İmom Huseyn (ə) və Kərbəlo şəhidon mədh kardə rozə və mərsiyon handəşone.
“Faktxəbər.com” dınyo muxtəlifə məmləkətonədə - İrağ, İndoneziya, Almaniya, Hindistan, Niqeriyadə əzadarə məclison bino be barədə məlumaton dərc kardəşe. İm sayt həmən xəbə dodə ki, Səudiyyə Ərəbıstani polisi Əl-Ğətif məntəğədə bə şion əzadarə məclis hucum kəşəşe, çəvon onoə çodoon rıjinəşe. Əhali çe polisi ım həvəşiə hərəkəti şikilon “Tvitter”ədə paybaxş kardəşe.
Boku hokumətən məmləkətədə məhərrəmə manqi əzadarəti səpe məhdudiyyət noəşe. Bə Dini təşkilaton dair Devlətə Komitə sədri muavin Səyavuş Heydərovi bə “Trend” sayti votəşe ki, məntəğonədə məmuron nəzarət bəkarden ki, əzadaron bə şemonon təşkil karde cəhd nıkon, əhali ıştə kədə təkiyon nıno, məçiti vədə dini şuar, pərcəm və diqər atributon enıhaşton, hırdənon və məktəbi şaqirdon əzadarə məclisonədə iştirak nıkon. Əks holədə məmuron de huğuğə muhafizə orğanon koməki jıqo cəhdon vəy bəsen. Im curə nəzarət de tosə Məhərrəmə manqi orəxi dəvom bəkarde.
