İroni de Az.R arədə media əlağon inkişaf kardedə

Sentyabrə manqi 14-minə ruji Az.R Mətbuatə Şura İİR Boku səfarəti mətbuatə katib Məhəmmədrza Nəcəfi xidməti muddət bə orəx rəse munsibəti qırdbemon dəvuniəşe. Bı tədbirədə diplomatik numayəndon, KİV sərdaron, jurnaliston iştirakşon bıə.

“Sputnik Azərbaycan” sayt xəbə dodə ki, Mətbuatə Şura sədr Əflatun Amaşovi ğeyd kardəşe ki, İron və Az.R mass-media numayəndon arədə rabiton inkişafədə çe səfir Cavad Cahanqirzadə və Məhəmmədrza Nəcəfi xeyli zəhmət və xidmətşon heste. Orəxnə 3 sorədə ki, ağayi Nəcəfi səfarəti mətbuatə katib ko kardedəbe, ım dı qılə devləti media təşkilaton arədə əlağon bə barzə inkişafə səviyyə rəsə. Amaşovi həmən votəşe ki, ayəndə vaxtonədə bə Azərbaycan və İron media numayəndon dıtərəfinə səfəron təşkil bəkarden.

Çe İİR Az.R-ədə səfir Cavad Cahanqirzadə ıştə nitğədə ğeyd kardəşe ki, İroni prezident Həsən Ruhani votəynə Azərbaycani inkişaf çe İroni, İroni inkişaf çe Azərbaycani inkişafe, Azərbaycani əmniyyətən, həmçinin çe İroni əmniyyəte. Bəzi ğodrəton çəmə devləton arədə munasibəton ğoym bıeku norohət bedən. Çəvon norohəti vəy se roədə har dı qılə keşvəri mass-mediya numayəndon kardə koon vey yolə əhəmiyyət hestışe.

Məhəmmədrza Nəcəfiən ıştə nitğədə İron-Azərbaycan əlağon barzə səviyyədə bıe ğeyd kardəşe, votəşe ki, çimi bəpeştən ım əlağon barzə səviyyədə mande roədə həniən səy bəkardemon.

Məclisi orəxədə Az.R Mətbuatə Şura Məhəmmədrza Nəcəfi de diplomiş təltif karde, bey xatirə hədiyyəş doe.