Hostoro kemrukə məntəğədə vəziyyət

Hostoro sərhədə kemruqə məntəğə 5 manqe ki, bə 24 saatinə koə rejim ovaştə. Radio Azadi həmonə məntəğədə mevcudə vəziyyəti barədə xəbə dodə ki, ısət ruji har vaxti bə İron şe–ome mumkune. İroni tərəfi bo Az.R şəhrıvandon viza rejim ləğv kardəşe, əmo Boku hokuməti hələ ım rejim oqətəşe. Imən məqəvuji çe İrono bə Az.R ovaştəkəson miğdari kam bıe səbəbonədə qıleye.

Im kemruqə məntəğə qıley nəzarətkari bə Radio muxbiri votəşe ki, har sutkə dırozi bə İron 1 həzo nəfərisən vey odəm ovaştedə. Çəvon əksəriyyət əsasən bo vıjorəti karde şedə. Hostoro şəhrestoni Arçon diy sakin Faiğ Dadaşizoə ğeyd kardəşe ki,  çəməku sesəkə ruən 15-18 mənot, İronədə isə çimisə 3 kərə erjone. Çəmə tərəfi camaat bə İron şedə ki, çəğono jı çi bıvardo, 5-6 mənot pul ğəzənc bıko, ıştə əmrəməli de təhəri dəvunio. İsət bə İron bo mualicə  şəkəsonən miğdar kam bıə. Çe İrono isə ruji 1-2 nəfər bə çəmə tərəf ovaştedə. Nəvuzə idə rujonədə oməkəson vey bedə. Çəmə tərəfədə bohoçiəti be səbəbiku, çe İrono bə cəmə tərəfi marağ kame.

Hostoro şəhəri sakin Çinqiz Məmmədov ıştə dastədə qətə boxçə nişon dodə, votedə ki, bə 30 mənot diəkə çanədə eyn-uyn səme. İ qit məşo çəməku 35-40 mənote, bə tərəfədə bə 13 mənot hıriəme.

Əziz nomədə qıley Hostorovoj votəşe ki, çəmə tərəfədə ticarət kamko bıə. Çunku bo mol hırie ro de çe Bokuku omedən, de hosoni bə İron ovaştedən, əyo bə erjonə ğıymət mol sedən. Çəmə vıjor isə  çe erji qıniə. Iştə mağaza və dukonon dəbaste məcburiyyətədə mandəmon.

İrono bokırniə maşinə şoferonən bekorətiku əziyyət kəşedən. Çunki bə İron osınə ro okırnie bəpeşt ticari molon veyni de vağonon kırnidən.