İron və Tırkiyə stratejikə rabitəon ali şura 5 minə iclosi oxonə bəyoniyə.
İron və Tırkiyə stratejikə rabitəon ali şura 5 minə iclosi oxonə bəyoniyədə 2 qılə kişvəron prezidenton bo 30 milyard dollar ticarəti icod karde bə Tehron-Ankara miyono tədbiron əncom bey iyən zərroriyə himoyədorətion təkid kardeşone.
Bə Telerədio aqentiyəti raporti əsos, ım mıştərəkə bəyoniyədə İroni prezident Həsən Ruhani və Tırkiyə prezident Rəcəb Təyyeb Ərdoğan bə siyasi iyən iğtisodiyə sohbəton dəvomi əhəmiyyət ijən 2 qılə kişvəri miyono ali rutbə heyəton vindemoni vositə 2 tərəfiyə rabitəon çimiku vey inkişof doe təkidışon karde.
Im bəyoniyədə İron və Tırkiyə təsdiğışon karde: mıştərəkə marzonədə bə P.P.K iyən Pejak onsoron terroristi və ğeyri ğanuniyə fəaliyəton əleyh tədbiron ijən de terrorizm və mıtəşəkil cinoyəton mubarizə barde həmkarion mexanizmiku hədeəksər istifodə kardey hər 2 qılə kişvəri mıştərəkə mənafe oqəte bois bəbe.
Im mıştərəkə bəyoniyədə İron və Tırkiyə prezidenton, çı Amerkə itərəfiyə sanksiyaon ki bə milləti jimoni, çəvon həmkari və rifoh ijən məntəğə stabiləti zidd əsəron iyən zərəron bois bıə ıştə niqəroni nışoşon do.
2 qılə kişvəri bə Suriyədə de radikalizm və terrorizmi mubarizə barde zərrorəti, Astanə prosessi çərçivədə bə həmkarion dəvomi lozim bey təkidışon karde və Yəməni oxonə vəzyəti barədə həm hər 2 tərəf İsveç muzakirəonədə i minə bə dast omə sazişiku ki Yəmənıjon miyono təsdığ bıə, himoyədorətişon karde.
Im bəyoniyədə 2 tərəf de terrorizm mubarizə barde və İraği obod kardeyədə Bəğdad dıvləti cəhdiku himoyədorəti və əmniyyət və iğtisod sahədə bə İron, Tırkiyə və İraği 3 tərəfiyə həmkarion inkişof doe əhəmiyyət təkid kardeşone.
Tırkiyə və İron ijən de Fələstin milləti komilə vəhdəti cəhətədə bə Fələstin və şərifə Ğudsi orzuku mudafiə karde mehvəriyəti təkid və harcurnə cəhdon bo Ğudsi tarixi və huğuğiyə vəzyəti əvəz karde məhkum kardeşone.
