Avropa parlamenti bə Az.R dair ğətnamə ğəbul kardışe

Məlume ki, bloqer Mehman Husenovi zindonə cəzo muddəti orəxe kam muddət mandə vaxtədə zindoni mudiriyyəti bə çey əleyh tojə cinayətə ko bino kardışe ki, ey çe məhbəso vanıdo.

Mehmani bımi etirazən ənəhardə aksiya elan kardışe. Eyən vote lozime ki, siyasiə məhbusi çe zindono vanıdoe ro bəvon tojə çinayətə ko oj karde iminə kərə ni. Əliyevi hokuməti ım nubətinə beədalətinə hərəkət bə ictimaiyyəti zumandə etirazi səbəb bıe. Zindonədə çand kəs siyasiə məhbus, həmən cəmiyyətədə ictimai təşkilatə fəalon de Mehmani həmrayəti nişon doşone və ənəhardə aksiya bino kardışone. Avropa və Amerika şəhəronədən Az.R səfarəton vədə azərbaycanıjon piketon dəvunişone.

Yanvarə manqi 17-də Avropa Parlamenti ım məsələ bə muzakirə bekardışe. Boku rejimi bə siyasiə fəalon munasibətədə repressiv əməlon  məhkum kardə ğətnamə de 533 nəfər deputati tərəfdarəti ğəbil bıe. 28 deputati isə bey əleyh sədo doəşe.

Ğətnamə umumən 13 bəndo ibarəte. De ım sənədi Avropa Parlament Əliyevi hokuməti Mehman Huseynovi  bedune şərt azad karde dəvət kardedə. Diqər siyasiə məhbusonən dərhal və de ğeyri-şərti çe zindono vadoe tələbi çe Boku hokuməti vədə nodə.

Parlamenti deputaton bə Xədicə İsmayılova təğibi və bə çey əleyh tojə cinayətə ko bino kardə təhdidiku ıştə norohəti ifadə kardəşone.

Zindonxononədə bə məhbuson fiziki zor və işqəncon tətbiğ kardə əməlon orəx doe çe hokumətiku tələb kardəşone.

Avropa Parlamenti de ım ğətnamə Az.R hokumət dəvət kardəşe ki, vəkilon azadə fəaliyyəti məhdud kardə, mustəğilə vəkilon çe huğuğə sistemiku beğandə əməlon çe arə bıbardo, bə Venesiya Komissiya, bəşəri huğuğon komissari məsləhəton, bə İMT prosedur ğəraron əməl bıko, bə beynəlxalğə standarton muvafiğ huğuğə azadion məmləkətədə bərpo bıkardo.