De Qəncə hadison əlağədar məhkəmə nimojə şəraitədə dəvunidən

Fevralə manqi 7-ədə Az.R Sər Prokuror Zahid Ğaralovi kolleqiya iclasədə elan kardışe ki, de Qəncə hadison əlağədar 51 nəfəri barədə 6 qılə cinayətə ko cobəco bo muhakimə karde ro bə Qəncə Qonə Cinayəton Məhkəmə vığandəşone.

“Azadlıq.info” sayt bə ım məhkəmon qardışi həsr kardə məğalədə nıvıştedə ki, “Az.R vahid məhkəmə portal”ədə ım proseson Qəncə Qonə Cinayəton Məhkəmədə dəvarde ğeyd kardə bıə, əmo həğiğətədə əvoni Boku Sabunçi Rayoni məhkəmə zalonədə dəvunidən. Im məhkəmon barədə  məlumati jıqo pepuşinie məğsəd əve ki, çe məhbuson nezə odəmon, huğuğə mudafiəkaron və jurnaliston  əyo iştirak karde imkanşon məhdud bıbo. Ce məhkəməku xəbə qətə və əyo iştirak karde məğsədədə bıə jurnalistonku sıftə çe ğeydiyyato dəvarde tələb kardedən. Imən əlavə prosedur tələbon icra nəzərədə qətedə və bə əlavə vaxt  qin karde səbəb bedə. Jıqo suni maneon nəticəy ki, oj dəvardəninə məhkəmə iclasonədə odəmon anədə kame ki, əvon bə səpuşə məhkəmə prosesi oxşəş dodən. Bə məhkəmə daxil bıe imkanədə bə jurnaliston jı çi nıvışte, kəşe ro imkan dodənin.

Muttəhimon vəkilon həmə çe devləti tərəfo təyin bıən. Mustəğilə vəkilon bı məhkəmə prosesonədə iştirakşon ni. Devlətə vəkilonən ım proseson barədə bə Respublika Mass-media məlumat dodənin. Əmo məhkəmə iclason çanədə formal dəvarde barədə bə ictimaiyyəti kali xəbon rəsedən. Məsələn, fevrali 8-minə ruji Sabunçi məhkəmə 8-minə zalədə dəvardə iclasədə 10 nəfər şahid ifadə doənin bıe, əmo çəvonədə hiç kəs bə məhkəmə omə nıbe. Hakim istintaği vaxti çəvon doə ifadə de ıştən hande roy bə iclasədə iştirakəkon nəzə rosniəşe. Vəkilonən bımi etirazə vəsadət bə nav doəşon ni. Yəni əvonən dərəsedən ki, ım məhkəmon tam formal mahiyyətədən. Hokuməti ım 51 nəfər muttəhimi tale vey vaxte ki, muəyyən kardəşe.