21 fevral – Beynəlxalğə Moə zıvoni ruje.

De YUNESKO ğərori 2000-minə soriku har sor fefralə manqi 21-minə ruj beynəlxalğə ictimaiyyəti tərəfo bənə Moə zıvoni ruji ğeyd bedə. Çe ım tədbiri əsasə məğsəd milliə kamiyə xalğon zıvonon ni bıe xəto çe arə bardeye.

Az.R-ədə ki, xeyli İron və Ğəfğaz zıvoninə xalqon jimon kardedən, bə çəvon zıvononən ım cürə təhdidon hestin. Əmo Boku hokuməti bardə siyasət əsasən bə devlətiə zıvoni, yəni azərbaycani zıvoni statusi həniən zümand karde xidmət karde səbəbiku, ım rujədə çe məmləkəti xalqon zıvonon barədə ne, çe devlətə zıvoni problemon barədə qəp je əfsəl zınedə. İm sori 21 fevralə rujən Respublika KİV–on bəştə ım ənənə sadiğ mandin. Məsələn, “İslamazəri.az” sayt Azərbaycani Milliə Elmon Akademiya Zıvonşunasiə İnstitiədə bə ım Ruji həsr bıə konfransədə direkror Mehsun Nəğisoyli votəyon bə əhandon nəzə rosniəşe. Nəğisoyli votəşe ki, çe azərbaycanə zıvoni əsasə problem əcnəbiə sıxanon oko doeye ki, de ım tendensiya mubarizə barde lozime. “Faktxəbər.com” saytən professor Buludxan Xəlilovi sıxanon misal vardedə ki, kali “ğeyri-peşəkarə zıvonşunasə eksperton” devləti zıvoni tədğiği imkanonku sərost istifadə karde zınedənin. Bı səbəbən ım koy bəpe bə peşəkaron həvolə bıke. Professor Sayalı Sadıqova xəbə doəşe ki, orəxnə 3 sorədə bə azərbaycani zıvon 2700 tojə sıxan daxil bıə. Im sıxanon bə “Tojə terminon izahinə luğət” əlavə kardəşone.

Bənə har sornə ım sorən Respublika Mass-medion məmlkəti co xalqon zıvonon barədə sıxan nıvotışone. İmən bə Əliyevi hokuməti ım xalqon zıvonon çe arə bardə siyasəti tam muvafiğe, və bey doə dastəke.