Boku hokuməti nat və ğazi idxal xeyli ziyod kardəşe

Az.R Devlətə Kemrukə Komitə ıştə ımsornə bə yanvar-fevralə manqon dair hesabatədə elan kardəşe ki, bı muddətədə bə xaric 5,78 milyon ton nat, 2,2 milyard kub metr ğaz ixrac kardəşone ki, bə ponə sori nisbətədə nati ixrac 58% , ğazi ixrac isə təğribən 10 kərə ziyod bıə.

“Faktxəbər” etiraf kardedə ki, Az.R ixracatədə nat və ğazi baxşə 87,4 % təşkil kardedə, ımən məmləkəti iğtisadiyyati  karbohidraton havateku bə jidastiə vəziyyət eqınie nişon dodə.

Jıqo vəziyyətədə daxili istehsalə məhsulon ticari devriyyə orəxnə 4 sorədə 46% saru eqıniə. Dəvardə sori ım tənəzzul 12% təşkil kardəşe. İm fakton bə “Azadlıq.info” İğtisadşunas Nemət Əliyevi votəşe. Ğeyd kardəşe ki, 2014-minə sori daxili məhsulon ticarət 19 milyard dollariku 2018-minə sori bə 10 milyard dollar eqıniə. Bı muddətədə məmləkəti vıjoronədə daxili molon 67%-ku bə 47% saru omə. Imən ey nişon dodə ki, de nati ğıyməti erjon bıe əlağədar Əliyev hokuməti iştisadiyyati ğeyri-natə sahon inkişafi barədə elan kardə proqram bəştə məğsəd rəsə ni, Umumi Daxili Məhsulədə nat və ğazi vəzn həniən ziyod bıə.

Devlətə Statistika Komitə ımsornə idxal-ixraci nişon doə məlumatiku oşko bedə ki, ımsori yanvarə manqədə bə keşvər idxal bıə məhsulon bə ponə sori yanvari nisbətədə 48%, əzcumlə qujdi idxal 64%, şıti idxal 21%  ziyod bıə. Imən Respublikadə heyvondarəti çanədə tənəzzul karde çok nişon doə qıleyən fakte.