Bokuədə “Diqlas” ticariə mərkəz kulət bıe.

Marti 26-minə riji “Diqlas” ticariə mərkəz ki, çe Boku Nizami rayoni əraziədə vırə qətəşe, zumandə otəşsuzi nəticədə kulət bıe. “Report” İA xəbə dodə ki, ım Mərkəzi 17559 kv.m sahəş heste ki, FHV Otəşhəmuşəkə Xidməti həmkaron çəvədə 275 kv.m hissə çe otəşiku muhafizə karde zınəşe.

Otəşi həmuş kardə koədə 13 nəfəri xəsarət səşe, çəvonədə 8 nəfər həmonə vəzarəti həmkaronin. Rayoni İcra Hakimiyyəti sərdari muavin İldırım Mehdiyevi məlumat doəşe ki, im ticariə mərkəzi sute nəticədə 420 nəfər dukon soyb bə maddi ziyani məruz mandə.

1 ruji bə çəton zərərdidə odəmon bə hadisə vırə qırd bıən, etirazə aksiya təşkil kardəşone, hokumətiku bəvon qıniə ziyani kompensasiya karde tələb bə nav doəşone. Cəvon bə hokuməti bina tərəf şemon təşkil karde cəhdi və polisə ğıvvon səşone. Nizami rayoni İcra hakimiyyəti səlahiyyətinə məmuron və Ticariə mərkəzi rəhbəron dəvon vindemon kardəşone, votəşone ki, ım problem çe prezident İlham Əliyevi diğğət və nəzarəti jitonoe. Muvafiğ təhğiğaton bəpeşt bə sahibkaron kompensasiya avjor kardə bəbe.

Əmo bı koədə əsasə problem bımədəy ki, ım sahibkaron hiç kəsi ıştə biznes sığorta kardə nişe. “Tolishmedia.com” sayti iğtisadi təhlilqər Natiğ Cəfərli ıştə “fasebook” səhifədə de ım mışğıli əlağədar nıvıştəy bə əhandon nəzə rosniəşe. Cəfərli fikir jıqoe ki, məmləkətədə hələ sığorta mədəniyyət bə forma eqıniəni. Bımi ro de ticarəti məşğul bıə har qıley dukoni xıvand bəpe ıştə molon rəsmən bə dast bıvardo,  həmonə molonən bə məmləkət bəpe rəsmən daxil bıbo, devləti kemrukə sistemən bəpe şəffaf ko bıko, bə keşvər idxal bıə məhdulon həmə rəsmən ğeydiyyato dəvunio. Jiqo bıbo, bəvədə dukoni soybonən ıştə mədaxili 14% -i ğədər bəpe verqi avjor bıkon. Həmə devlətə sistemi huğuği əməlonku kənoədə ko karde səbəb bedə ki, jıqo fors-major vəziyyətonədə bə şəhrıvandon kompensiya doe məsələ bə mışğıl eqınidə.