Az.R-ədə bohoçiəti dəvom kardedə

Har sor Az.R vıjoronədə Nəvuzə idi nezi ərzaği ğıyməton boho bıe bə qıley ənənə peqardə. Im sorən jəqo bıe. Fevralə manqədə bə Statistika Komitə rəsmi məlumati əsasən sənaye və ərzağə məhsulon, həmən xidməti sahədə ğıyməton 1%-ku tosə 3,5% boho bıe. Isət Respublikadə vəziyyət jıqoe ki, həmonə proses hələən dəvom kardedə.

 “Yenicağ.az” sayt  xəbə dodə ki, orəxnə 10 rujədə Boku vıjoronədə piyozi ğıymət 70 kopikiku bə 1 mənot 30 - 1 mənot 50 kopik ros bıə. Jıqo bohoçiəti kartofi ğıymətədən muşahidə bedə. Orəxnə 2-3 rujədə kələmi 1 kilo bə 1 mənot 50 kopik – 2 mənot həvatedən.

Çe iğtisadi eksperton Respublika vıjoronədə bə ım təbəddulaton fikir muxtəlif curey. Natiğ Cəfərli votedə ki, məmləkəti daxilədə ərzağə məhsulon istehsali səviyyə saru bıe, çəmə vıjoron çe idxaliku bə jidastiə vəziyyət eğandəşe. Hərçənd ki, Di təsərrufati Vəzarət elan kardedə ki, ımsor məmləkətədə , məsələn,  piyoz daxili istehlakisən vey istehsal bıə.  Orəxnə vaxtonədə daxili istehsalə di təsərrufati məhsulon bə ixrac vığande ziyod bıə, ımən daxili vıjoronədə ğıtiəti bə əməl vardəşe və təbii ki, bə bohoçiəti səbəb bıə.

Diqər təhlilqər Nicat Nəsirli fikir jıqoe ki, İrono idxal bıə məhsulon bə daxili vıjorə ğıyməton təsir hestışe. Əqər İron ıştə vıjorədə ğıyməton bə səhmon eğande ro ım məhsulon bə xaric vığande səpe ğədəğə bınoən, ım bə çəmə vıjori ğıyməton dırozmuddətinə təsir nişon doe nibəzne, çunki çəmə hiyonədə bo tojə məhsulon perəse kam vaxt mandə.

Di Təsərrufati Vəzarəti muşavir Firdovsi Fikrətzadə kələmi boho bıe səbəb jıqo izah kardəşe ki, ım sor Respublikadə çey istehsal bə ponə sori nisbətədə 18 % ziyod bıə - bə 108 həzo ton rəsə. Əmo kələmi ixracədən peros heste. Ponə bə xaric cəmi 800 ton kələm vığandə bıəbebu, ımsori 2 manqədə ım məhsuli 1324 ton ixrac bıə. Imən daxili vıjoronədə bə kələmi ğıyməti ros bıe səbəb bedə.