“Amnesty International”-i Boku hokumət bə işqəncon orəx doe dəvət kardəşe.

“İslamazeri.com” sayti xəbə doəşe ki, Amnesty International beynəlxalğə huğuğə mudafiə təşkilat Az.R-ədə bə məhbuson işqəncə doe holon dəvom kardeku ıştə norohəti bəyon kardəşe və ıştə tərəfdaron dəvət kardəşe ki, çey bə İlham Əliyevi vığandə muraciəti dastəq bıdon, bey ğol bıkəşon.

Əsıl həğiğətədən ısət Boku polisxonə və zindonxonəonədə vəziyyət xeyli ğıvonine, bə məhbuson işqəncon arə dodəni. “Azadlıq.info” sayt çe Boku Suraxani rayoni Polisə İdarədə bə Ğərəçuxur ğəsəbə sakin Ruslan Cumayevi doə işğəncon, hətto məhkəmə ey azad karde bəpeştən, həmonə polison tərəfo çey  bə təhdid, təğib və təzyiğon məruz mande həxədə apreli 11- minə ruji bə cəmiyyəti məlumat doşe.

Huğuğə mudafikar Oqtay Quləliyeviən de Qəncə hadison əlağədar dəstqir bıə dindaron məhkəmə barədə ıştə fikron bə cəmiyyəti nəzə rosniəşe. Ey apreli 11 və 12 –minə rujon Sabunçi rayoni məhkəmədə de ım hadison əlağədar 2 qılə qrupi muhakimə  iclasonədə iştirak karde zınəşe. Məlum bıə ki, istintaği vaxti bə məhbuson munasibətədə sə qətə ğeyri-ğanuniə əməlon məhkəmədən dəvom kardəşe. Dindar Rauf Bayramovi ıştə bədənədə işqəncə rizon bə hakimi nişon doe piəşe, əmo hakimi bımi imkan doəş ni. Həmə muttəhimon bəvon beəmonə işqəncəon  doe votəşone, hakimon isə bı fakton pape bıə nin.

Çe dindar Oqtay Huseynzadə daxil bıə qrupu uzvon de cinayətə məcəllə 23 qılə - de odəm kışte, silah novnie, hakimiyyəti de zori bə dast ovoştınie cəhd karde, terror, ğoldurəti və sair maddəon ittiham bedən. İm ittihamon anədə absurd, bedəlil və besubutin ki, prokuror bə vəkilon sualon “ Əmə de ım maddıon əvoni ittiham kardedənimon” – vote məcburiyyətədə mandə. Oqtay Quləliyev əlavən votedə ki, de ım maddəon ittiham bıə muttəhimonədə kali kəson  həmonə hadison vağeə bıə rujonədə umumən nəinki mitinğə meydonədə, hiç Qəncə şəhəri ıştənədə bıə nin. Vəkilon çand kərə bə hakimi ədalətinə muhakimə barde imkan nıdoe etiraz kardəşone, əmo çəvon ım vəsadəton hiç qılə təmin kardə bıə nin.