De Az.R dini məhbuson həmrayətiə tədbiron.
Prezident İlham Əliyevi 16 mart sərəncami bə peş məmləkəti zindononədə 87 nəfər siyasiə məhbus mande. Bə Sulh və Demokratiya İnstituti direktor, huğuğə mudafiəkar Leyla Yunusi və Siyasiə Məhbuson Monitorinqə Mərkəzi sərdar Elşən Həsənovi tərtib kardə siyahi əsasən həmonə 87 nəfərədə 56 kəs islamiə məhbusono ibarəte.
De Qəncə hadison əlağədar dəstqir bıə məhbuson məhkəmə dəvom karde səbəbiku əvon bı siyahi daxil kardə bıə nin.
İİR şəhəronədə de ıştə Az.R zindononədə əziyyət kəşə dini həmməsləkon həmrayəti tədbiron dəvardən. Təbrizədə “Həzrəti Əbəlfəzl (ə)” məçitədə təşkil bıə mərasimədə hoccətul-islam Muctəba Nəzəri votəşe ki, “ Az.R cəmiyyəti veyni Əhli-beyt (ə) məktəbi dəvom kardəkəsono ibarəte. Azərbaycani devlət bəpe ım foydəmandə cəhəti ğədi bızıno, bə şion ıştə dini mərasimi icra karde ro şərait bısoxto. Əmə ım devlətiku pidəmone ki, çəmə ım dustə devlət ıştə islamiə məhbuson azad bıko, demiən çe İroni və Az.R diniə fəalon həniən zumandə dastəki bə dast bıvardo.
Jıqo qıley tədbir Zəncan şəhərədən dəvardə. Mərasimi xətib hoccətul-islam Şeyx Əli Nasir`i ğeyd kardəşe ki, çe Az.R əhali 85% şiəy. Bı səbəbən əv dınyoədə bənə 2-minə şiə məmləkəti zınə bedə. Sovet hakimiyyəti vaxton dini repressiyon hest bıe, şiə təfəkkurən təzyiğon jitono bıe. Əmo əhali ıştə dini əğidəku dast nıkəşışe, bə İmom Huseyn (ə) ıştə məhəbbət bə ayəndə nəslon dəvunişe. Sovetə İttifaği vılo bıe bə peş sionistə ğıvvon Az.R jimoni həmə sahon bəştə nəzarəti ji dənoe zınəşone. Isət de çəvon dəsturi əyo şiə alimon bə zindon dənodən, şiə ayin və mərasimon dəvunie səpe ğədəğə və məhdudiyyəton nodən.
Hoccətul-islam Şeyx Əli Nasir ıştə nitği orəxədə bə Az.R hokuməti çəşnavi doşe ki, bə sionist və Ğərbi rejimon peştıpur bıə hokuməton ağibəti nəzər səğando, boştə ibrət peğəto, bə islami molyəton hurmət oqəto, de islamiə fəalon rəşadəti ıştə məmləkəti çe işğaliku azad bıko.
