Az.R-ədə idxal bə rekord hədd rəsə.

Az.R Devlətə Kemrukə Komitə məmləkəti 3 manqnə xarici ticari devriyyə statistika elan kardəşe. İğtisadşunas Revşən Ağayevi ım rəğəmon şərh kardeədə votəşe ki, Respublikadə idxal hiç vaxt danə ısətnə səviyyə vey bıənıbe.

Kemrikə Komitə məlumatiku oşko bedə ki, bə məmləkət idxali har manqnə miğdar de miyonə hisobi 1 milyard dollarisə dəvardə, 3 manqədə 3 milyard 135 milyon dollari ğədərədə məhsul bə keşvər idxal kardəşone. Əqər tosə sori orəxi ım temp jıqo dəvom bıko, jəqo im rəğəm bə 13 milyard dollari nez bəbe. Hərçənd ki, dəvardə soronədə bə məmləkət idxal bıə məhsulon miğdar 10 milyard 700 milyonisən vey bıə ni. Ğeyri-natə məhsulon bə xaric ixracatədən proqress bə çəşi qınidəni. Dəvardə sori 3 manqədə əqər ım məhsulon umumi ixracati 10% təşkil kardedəbebu, ımsornə 3 manqədə ım rəğəm bə 9% eqıniə.

“Sputnik Azərbaycan” saytən bə Kemrukə Komitə məlumati əsasən xəbə dodə ki, ımsornə 3 manqədə bə məmləkət şıti idxal bə ponə sori nisbətədə 17% ziyod bıə.  İxrac və idxali saldo musbət 1 milyard 349 milyon dollar bıə ki, ımən nat və ğazi ixraci nəticədə bə əməl vardə bıə.

İğtisadşunas Nemət Əliyeviən Respublikadə investisiya muhiti tamam bə kıltoşə vəziyyət eqınie ğeyd kardəşe, votəşe ki, çimi səbəb hokuməti iğtisadiyyatədə kolhındə siyasət bardeye. Jıqo siyasəti nəticəy ki, ım sornə 3 manqədə bə istehsali noə sərmayə çəmi 1 milyard 700 milyon mənot bıə ki, ımən bə ponə sori muvfiğ 3 manqi nisbətədə 500 milyon, de piyonə sori muğayisədə 1 milyard mənot kame. Devlətə Statistika Komitən ım fakti təsdiğ kardedə. Demiən məlum bedə ki, orəxnə 2 sorədə investoron ıştə maliyyə resurson çe məmləkəto bekardə proses hələən dəvom kardedə.

Im , keşvəri iğtisadiyyatədə dəvominə  tənəzzuli nişon doə əsasə əlomətonədə qıleye. Hokumət təcili ğaydədə ım tendensiya vəy se ro əsasinə islahaton bardənine.