Əliyevi hokuməti bardə islahaton səmərə nıdoşe.

2015-minə soriku, yəni nati məzənnə erjon bıə vaxtiku prezident İlham Əliyev daima məmləkətədə iğtisadi islahaton barde həxədə votemonon kardedə. Bə çimi aid hətto qıley dırozmuddətinə Strateji Roy Xəritəşən tərtib doəbe karde.

Çey elan kardə islahaton ən əsasi ğeyri-natə sahon inkişaf kardovnie nəticədə iğtisadiyyatədə çey vəzni ziyod karde be. Isət çə devriku 4 sorisən vey vaxt dəvardə, haliyədə mevcud iğtisadi rəğəmon Əliyevi həmonə islahatə proqrami təmomən iflas bıe nişon dodə.

“Azadlıq.info” sayt çe iğtisadşunas Nemət Əliyevi bı barədə votəyon bə əhandon edaştəşe. Əv bə Devlətə Statistika Komitə elan kardə orəxnə məlumaton əsasən ğeyd kardedə kİ, 2019-minə sori yanvariku tosə aprelə manqi natə sektori məmləkəto bə ixrac vığandə məhsulon arədə hissə bə 92% ros bıə, 7,1 milyard dollar məbləğədə ixrac məhsuli 6,5 milyard nat, natə məhsul və ğazo ibarət bıə. Yəni ım sori sıftənə kvartalədə ğeyri-natə məhsuli ixracatədə həcm cəmi 8% bıə. Nemət Əliyev iyo məxsusi ğeyd kardedə ki, ponə sori ım rəğəm 9%, pionə sori 12,  ço sor bə nav, yəni İlham Əliyevi islahaton elan kardə sori isə 14% təşkil kardəşbe.

İğtisadşunas Əliyev ğeyd kardedə ki, islahaton bə ğeyri-natə sektori jə zərbə de imi orəxedəni. İmsori sıftənə 4 manqədə bə məmləkət ərzağ və ğeyri-ərzağə məhsulon idxal 50% ziyod bıə, haliyədə daxili istehlakədə xariciə məhsulon həcm bə 68% rəsə. Orəxnə 5 sorədə bumiə məhsulon daxili vıjorədə devriyyə 5,7 milyard dollariku bə 2,1 milyard dollar eqıniə, yəni 2,7 kərə kam bıə. Vəhaliyən 2004-2018-minə soronədə, yəni İlham Əliyevi prezidentəti devr`ədə bə məmləkəti iğtisadi inkişafi devləti budcəku 245 milyard dollar məbləğədə sərmayə xarc kardəşone. İştə votəyon orəxədə Nemət Əliyev təklif kardedə ki, bə xalqi çimi hesabati doe lozime.