Qəncə məhbuson məhkəmədə hakim bə vəkilon rıjd omedə

De Qəncə hadisə əlağədar dəstqir bıə mənbuson 8 nəfəro ibarət 4-minə qrupi məhkəmə dəvom kardəşe. Meydan TV xəbə dodə ki, hakim Dadaş İmanov ım prosesi obyektiv ne, de ğərəzi bardedə.

Çey ğeyri –ğanuniə hərəkəton bə qıley hədd rəsedə ki, əv nəinki muttəhimon səpe eçıridə, bəvon rıki qətedə, çəvon sıxanon ebıridə, hətto bə vəkilonən rıjd omedə, dəvon hoziə rəftor, əvoni təhğir, çe Vəkilon Kolleqiyaku beğandovnie təhdid kardedə. Çey ım hoziəti səbəb bıə ki, vəkilon kollektiv surətədə ərizə nıvıştəşone, bə İmanovi ım koy barde etiraz kardəşone. Bı ərizədə əvon bə Dadaş İmanovi ğərəzkarəti dair xeyli fakton aşmardəşone. Məsələn, jıqo qıley beaburinə epizod təsvir kardəşone ki, vəkil çe qıley şohidoku parsedə ki, “polisxonədə odəmon kue vindəşe?”, şohid ımi təsdiğ kardəcəğin, hakim de ğeyzi bə ım dialoqi mudaxilə kardəşe, həmonə parsi və cəvobi bə məhkəmə koy daxil karde imkan doəşni. Səbəbşən jıqo izah kardə ki, “ şımə ım ko bə Avropa Məhkəmə bekarde pidəyone, bımi imkan nibədomon”. Muttəhimon bə prokurori ittihamon etiraz kardeədə hakim İmanov bəvon rıjd omedə, votedə ki, “jiqo məkən ki, boşmə de co maddə tojə cinayətə ko oj bıkəm”. Porkurorən rə-rə muttəhimon və vəkilon təhğir kardedə, hakim nəinki bey irad qətedəni, həmişə çey tərəfədə mandedə.

Məhkəmə iyuli 25-ədə dəvom kardənine.

AİŞ devlətə departamentədə 3 rujnə  “Tarixədə ən yolə dini azadiə hadisə” nominə de 106 qılə devləti numayəndon iştiraki iclas dəvardə. Mubariz Ğurbanlıən Az.R həmonə tədbirədə təmsil kardəşe. Bənə iclasi yekuni devləton 9 qılə bəyannamə ğəbul kardəşone. Qurciston və Ermənistoni numayəndon bə həmonə bəyənnamon həmməy ğol kəşəşone. Az.R numayəndə isə bə 4 qılə ğol kəşəşe, de əmandəyon, əz çumlə “De terrorizmi mubarizə barde vonə dini azadi prinsipon məhdud karde” nominə bəyənnomə rozi bıə ni və bey ğol kəşəş ni.