Az.R-ədə ovi problem

Çe Az.R əraziku bənə Kur və Arazi 2 qılə purovinə ru dəvardedə. Hələ Soveti vaxton bə Aran zona kaştekorə zəminon və dion ovrosniə kanalon okırniəşonbe. Əmo mustəğiləti vaxtonku jıqoşə əhali, həmən kaştejori beməyon de ovi təchizatədə mışğılon sorbəsor qıvonin bedə.

Azadi Radio muxbiri İmişli, Saatli, Biləsıvo rayononədə ovi problemi barədə de əhali vindemonon kardəşe. Biləsıvo şəhrestoni İsmətli diy 4 həzo əhali hestışe. Əvon bə İlham Əliyevi muraciət kardəşone ki, ovə təchizatədə bəvon komək bıkardo. Im diy bələdiyyə sədr Mirzəxan İbayevi bə muxbiri votəşe ki, əhali ovə problemi həll karde ro xeyli ko vində bıə. İyo qıley mışğıl çımədə ibarəte ki, Aranli və Çinarli diy sakinon çəvon diy kanaliku bə İsmətli  tərəf lulə okırnie əleyh beşedən. Nezə vaxtonədə qımon heste ki, dəvon bə roziəti ome mumkun bəbe.

Diy sakin İxtiyar Ağayeviən votəşe ki, Cərçili nominə əraziədə kifayət ğədər ov heste. Əmo həmonə istiğamətədə bə rayoni vəzifədaron mənsub de həzo hektaron kaştejorə hion hestin ki, ə ovə mənbəon bəvon sərf bedə, bə çəmə zəminon həmonə mənbonku istifadə karde imkan dodənin.

Saatli rayoni Əliabad və Məmmədabad dionədən nəinki bo beməyon, hətto bo peşome ro ov peydo karde bə mışğıl eqıniə. Yusif Ağayevi votəşe ki, hətto bo dast-dim şışte ovşon ni. Har həftə bə maşini 10 mənot dodən ki, boəvon peşomə ov bıvardo. Çəvon kaştə pambə hion beovətiku sutedən.

İmişli rayoni Məhəmmədli diy əji Sarvan Ataşovi ğeyd kardəşe ki, çəvon diy kənoku dəvardə Rəsullu arxədə ov anədə saru eqıniə ki, çəvədə bə kaştejori səmt doe mumkun bedəni, həmən ovi jıqo kam bıe fermeron arədə bə hesıbeson, hətto bə perıziey səbəb bedə.

Muxbiri bə  ım rayonon çavabdeh rəhbəron doə parsonış cəvob se zınəni.