ĞMİ de Məhərrəmə manqi dame və Aşura ruji əlağədar fətva doəşe
Çe Ğəfğazi Mısılmonon İdarə Ğaziyon Şura və Elmi – Dini Şura de Məhərrəmə manqi dame və Aşura ruji əlağədar fətva pevolo kardəşone.
Əvon bəyon kardəşone ki, Hicri 1441-minə sori Məhərrəmə manqi 1 bə Miladi təğvimi sentyabri 1-minə ruj eqınidə. Tarixi dırozi həmə səmavi dinon tərəfo bənə sulh və əmniyyətə manqi ğəbul bıə ım manqi 10-minə ruj, vey təəssuf bıbo ki, hicri 61-minə soriku bə çəton bənə şəhadət və huznə ruji ğeyd kardə bedə. Aşura ruji vağeə bıə hadisədə İmom Huseyn (ə) və çey səhabəon, Əhli-Beyt (ə) və çəvon tərəfdaron Kərbəlo daştədə şəhid kardəşone, xeyzononşon əsir peqətə. Çə vaxtnəku İmomi (ə) həx və ədaləti roədə şəhadət bo bəşəriyyəti mənəvi komiləti və rosbemoni qıley numunəy. Bı səbəbən İmom Huseyn (ə) əzadarəti bədbinəti və beumuəti ruhədə ne, bə vətən və imoni məhəbbət, həmən bə mubarizə dəvət ruhədə bəpe bıbo.
“İslamazeri.com” sayti bə əhandon edəştə həmonə fətvadə votə bedə ki, məhərrəmə mərasimon bə İmom Huseyn (ə) şərafəti muvafiğ tərzədə ğeyd bənine. Bə devləti ğanunon əsasən taziyə məclison bəpe məçiton və ibadətə ocəğonədə və çəvon ərazionədə təşkil kardə bıbo. Im mərasim və ayinon iqlə ĞMİ rəsmən təsdiğ kardə dini xadimon tərəfo idarə bənine. Həmonə dini xadimon çe İmom Huseyn (ə) mubarizə və Kərbəlo faciə mahiyyəti bəpe sərost izah bıkon, bo şəhadəti fəlsəfə, həmən vətəni təəssubi və milli mənafe təbliğ karde ro ciddi cəhdon nişon bıdon. İbadətə məkanonku bə kəno şemonon təşkil karde, ço məmləkəti pərçəm və rəmzon bə mərasimon varde ro doe nibəbe.
Fətvadə həmən ğeyd kardə bedə ki, taziyə rujonədə bə İmom Huseyn (ə) xoto təşkil bıə məraminə xundoə aksiya bə cəmiyyəti rəğbəti səbəb bıə. Respublika Səhiyyə Vəzarət məcit və ibadətə ocəğon nezə tibbi məntəğəonədə xundoə aksiyon bə jimon dəvunie təşkil bəkarde.
