Az.R ərteşədə sərbozon mutəmadi tələf bedən
Sentyabri 22-minə ruji Meydan TV xəbə doşe ki, çe Cəlilobod rayoniku bə hərbiə xidmət şə Ğarayev Nahid Cəmili zoə hərbiə hissədə vağeə bıə ğəzo nəticədə həlok bıə. Əv Naxcivani Sərhədə Xidmətədə ğolloğ kardedəbe, bo təxris bıe 1 həftə vaxtış mandəbe.
Sentyabri 20-ədə Mudafiə Vəzarəti qıley məlumat pevolo kardışe ki, məmləkəti hərbiə hissəon qıleyədə naməlumə şəraitədə sərboz Məmmədov Elyarbəy Beyqəli zoə ıştə con çe dast doəşe. Əv Samux rayoni Sariğaya diədə bə dınyo oməbe. De ım təlafati əlağədar istintağə ko bino kardəşone.
Sentyabri 19-ədə Ağstafa rayoni hərbiə hissədə Huseynov Sənan Afəti zoə ğeyri-hərbiə şəraitədə həlok bıe barədə çey əvlodon bə Meydan TV məlumat doəşone. Sənan Huseynov 2000-minə sori Cəlilobod şəhrestoni Seyudli diədə moəku bıəbe. 1 sorbe ki, hərbiədə xidmət kardedbe. Hərbi hissə rəsmiyon marde səbəbi çeyku xunə noxəşi, jəni leykemiya bıe nişon doəşone. Əmo Huseynovi əvlodon votedən ki, bə əskər şeədə tibbi muayinə çeyku hic qıley noxəşi bə oşko bekardəş nıbe.
Seyudli di icra numayəndə Rəzzaq İsbatovi de muxbiri qəpədə Sənan Huseynovi çe noxəşiku marde təsdiğ kardəşe.
Devlətə Sərhədə Xidməti ki, Huseynov əyo xidmət kardedəbe, bı barədə rəsmi məlumat doəş ni.
Əlavən ğeyd karde lozime ki, dəvardə soronədə hərbi hissonədə vağeə bıə ım curə faciəvi hadison qınokaron bə məsuliyyət cəlb əbin. Məsələn 2015-minə sori dekabrə manqi 27-ədə Naxçıvani hərbiə hissədə qıley sərboz mardəbe. İstintaği nəticədə məlum bıəbe ki, həmonə hissədə bə sərbazon munasibətədə xeyli işqəncə, ğeyri-insonə rəftor, hətto təcavuzə hərəkəton hestinbən. İstintaği bardə təhğiğati ım hərəkəton qınokar muəyyən kardəşbe, məhkəmə beyo 13 sorinə zindonə cəzo bıriəşbe. Orəxnə soronədə hokuməti Respublika Mass-medion səpe senzura zumand karde səbəbiku hərbiədə anədə tələfati qınokaron bə məsuliyyət cəlb bıe barədə jəğo qıley məlumati rast ome mumkun bedəni. Sərbazon mardeədə qınokarə odəmon çe cəzoku bə kəno mande, keşvəri ərteşədə bə beçinə sərbazon tələfi miğdari şe-şe ziyod bıe səbəb bedə.
