Jurnalist, siyasiə məhbus Polad Aslanovi ənəhardə aksiya elan kardəşe.
“Xəbərman.com” sayti sərredaktor Polad Aslanovi istintağ karde ro zindonədə oğətə 4 manqnə muddət oktyabri 12-ədə bə orəx rəsedə. Bı səbəbən Səbayil rayoni məhkəmə oktyabri 5-minə ruji çey zindonədə oğətə muddət həniən 4 manq, tosə fevralə manqi 12 dıroz kardəşe.
Aslanovi jimoni həmro Qulmirə Aslanova bə Meydan TV votəşe ki, məhkəmə ım ğəror beəsose, bə qorə əvon apelyasiya şikayəti bədon. Qulmirə xanımi həmən bə Azadi Radio votəşe ki, Poladi hələ məhkəməku bə nav bey votəşbe ki, qirəm məhkəmə çey zindonə muddəti dıroz bıko, əv ənəhardi elan bəkarde. Ey oktyabri 9-ədə bə kə zanq kardəşe, votəşe ki, şanbə rujiku, yəni manqi 5-iku ğida ğəbul kardedəni.
Polad Aslanov ımsornə iynə manqi 12-ədə Devlətə Əmniyyətə Xidməti dastqir kardəşe. Bey devlətiə xəyanət ittiham bə nav doəşone. Əv de 20 soriku tosə umrinə zindonə cəzo təhdid bedə. Aslanov ım ittihami rədd kardedə, Devlətə Əmniyyətə Xidməti həmkaron rışvəxorəti barədə ıştə rəhbərəti kardə saytədə materialon dərç karde səbəbiku bey şər və bıhtonə ittiham ğande votedə.
Oktyabri 9-ədə Tbilisiədə Avropa Əmniyyət və Həmkarəti Təşkilati (OБСЕ) Cənubiə Ğəfğazədə bə azadi və əmniyyətə məsələon dair 2 rujnə konfrans bino bıə. “Bemarzə reportyoron” təşkilati direktor Yohann Bir Az. Respunlikadə bə KİV-on qıvoninə vəziyyəti diğğət doəşe. Boku hokumət dəvət kardəşe ki, jurnaliston azad bıkardo, bə çəvon vəkilon təzyiğ kardeku dast bıkəşo. Həmən təklif kardəşe ki, Az.R bəşəri huğuğon darışte səbəbiku bey Maqnitski ğanunədə nəzərədə qətə bıə sanksiyon tətbiğ bıbo.
Çe Azərbaycani Prezident Adminstrasiya numayəndə Kamran Həsənov və Xarici Koon Vəzarəti numayəndə Leyla Abdullayeva cey votəyon ğərəz və bıhton hisob kardəşone, votəşone ki, Yohann Bir`i bəpe 1 milyon azərbaycanıjə pənahəndon huğuğon barədə qəp jəşbe. Biriən bəvon cəvobədə ğeyd kardəşe ki, əv Azərbaycanə Respublikadə jurnaliston vəziyyəti barədə hartərəfinə tədğiğat bardə bə peş bə joqo ğəror omə, hicən təsaduf ni ki, ım keşvər mətbuatə azadi indeksədə 166-minə vırədəy.
