Boku hokumət ıştə şəhrıvandon huğuği həniən vey darıştedə.

Entexabaton Monitorinq və Demokratiya Tədrisə Mərkəzi 2001-minə soriku ıştə fəaliyyət bino kardəşe. Çe Avropa Əmniyyət və Həmkarəti Təşkilati (ОБСЕ) ğeyri-hokumətə onoemonon şəbəkə uzve. Az.R-ədə 15 qılə entexabati monitorinq dəvuniəşe.

Oktyabrə manqi 14-ədə məmləkətədə Boku hokuməti tərəfo bə bəşəri huğuğon darıştə fakton dair ıştə monitorinqi nəticəon elan kardəşe. Im hesabat 2019-minə sori 3-minə çətvəri, yəni iyul, avğust, sentyabrə manqon əhatə kardedə. Bı vaxtədə Monitorinq Mərkəzi 474 qılə bəşəri huğuğon darıştə fakt bə ğeyd səşe. Im rəğəm bə navonə manqon nisbətədə xeyli veye. Bı 3 manqədə mulki, həmən siyasiə huğuğ və azadion səpe noə məhdudiyyəton çe arə barde ro hokuməti hiç qıley səy nişon doəş ni. Im çətvərədə ən vey huğuğə darıştəyon məhəkməonədə vağeə bıə. Əqər dəvardə 3 manqədə de məhkəməon beədolətinə ğəraron əlağədar 65 qılə fakt muşahidə kardəşonbebu, ım çətvərədə jıqo ğəroron miğdar 83 qılə bıə.

 Siyasi motivinə məhkəməonədə bə hukmon məntiği izahaton nıdoe, vəkilon doə vəsadəton hakimon tərəfo beəsos rədd karde, işqəncə fakton təhğiğ nıbe, əsas huğuğə darıştəyə fakton bıən. Im 3 manqədə həmməysə vey bə jıqo darıştəyon  Qəncə Qonə Cinayəton məhkəmə və Qəncə Apelyasiya məhkəmə ro doəşone.

Sosialə şəbəkəonədə bə nıvıştə fikron qorə şəhrıvandon bə polisə şebon vanq karde, bəvon rıjd ome, əvoni bə inzibatiə zindonə cəzo məhkum karde, jurnaliston polisi tərəfo bə zoriəti məruz mande faktonən ım 3 manqədə ziyod bıə.

Sərbəst qırdbemon dəvunie huğuği səpe hokuməti noə məhdudiyyət dəvom kardəşe. Im huğuğ ən vey çe Boku İcra Hakimiyyəti tərəfo darıştə bıə.

Monitorinq Mərkəzi ım hesabati barədə “Azadlıq.info” sayti bə əhandon    xəbə rosniəşe.