Boku polisi şəhərədə mitinq dəvunie cəhdi və səşe.
Muxalif “Milli Şura” bo oktyabrə manqi 19 Boku şəhəri “28 may” meydonədə etirazə mitinq elan kardəşbe. Hokuməti bəvon ım tədbiri paytaxtiku bə kəno – Lekbatan ğəsəbədə dəvunie icazə doşe. Əmo muxalifəti lideron ıştə ım tələbədə həkəm mandin. Çimi muğabilədə hokumət bə fevğəladə tədbiron dast ğandışe.
Həmonə ruji xeyli əlavə polisə ğıvvon bə paytaxt vardışe, çand qılə metro stansiyaon dəbastışe, bə həmonə meydon omə roon pebırişe, rayononku bə paytaxt omə roon bə nəzarəti ji peqətışe. Hətto çe Sumğayıto bə Boku omə ictimai nəğliyyaton hərəkət məhdud kardışe.
Əmo anədə əks tədbiron effekt nıdoşe. Xeyli miğdarədə əhali bə kuçəon beşin, “İstefa”, “Azadi”, “Ğərəboğ” şuaron de barzə vanqi bə zıvon vardışone. “Milli Şura” rəhbərono ibarət i qrup de Əli Kərimli bahəm bə mitinğə meydon ome ro cəhd kardışone, polison bımi imkan nıdoşone, Əli Kərimliən daxil əvonşon dastqir karde. Şuar votə xeyli fəalonən bə polis şebə bardışone. 2-3 saati muddətədə polison əhali çe meydoni ətrofiku diəro karde və mitinq əhvoli çe arə barde nail bıe zıneşone.
Çey maşkinə ruji Boku Sər Polisə İdarə məlumat doşe ki, 60 nəfər fəal bə şebə bardəşone, çəvonədə 18 nəfər bə məhkəmə cəlb bıə. Bə əmandə 42 nəfəri rəsmi çəşnavi doə bəpeş vadoəşone. Meydan TV xəbə doşe ki, Sabirabad rayonədən polisi 17 nəfər siyasiə fəal muvəğğəti dastqir kardəşbe. AXCP sədr Əli Kərimliən azad kardəşone. Çey sıvvətədə fiziki təsiri rizon hesbin. Ey votışe ki, polison əv xeyli kuəşone və ım proses bə video kəşəşone.
“ Tolishston.com ” sayt de hokuməti ım ğədər antidemokratik və antikonstitusion hərəkəton əlağədar Tolışə Siprişon Ali Şura etirazə bəyonat bə ictimaiyyəti nəzə rosniəşe. Cəmil Həsənli ıştə səhifədə çe “Milli şura” de ım məsələ əlağədar bəyanat dərc kardəşe. “Musavat” partiya sədr Arif Hacılı, Respublika Alternativ Partiya sədr İlqar Məmmədov və həniən co muxalifə təşkilaton bə Boku hokuməti jıqo beysurə hərəkəton ıştə etiraz bəyon kardəşone.
