19 oktyabr mitinqi Avropadə əks-sədo doşe

De Milli Şura təşəbbusi oktyabri 19-ədə Bokuədə etirazə mitinq dəvunie cəhd, və ey Əliyev hokuməti tərəfo de hoziəti vılo karde, xeyli siyasiə fəalon polisi tərəfo dəstqir bıe, bə inzibatiə cəzo və bə cərimə məruz mande, bə Avropa ictimaiə təşkilaton etirazi səbəb bıe.

Avropa İttifaği ali numayəndə Federika Moqereni mətbuatə xidməti bəyon kardəşe ki, Boku hokumət ım aksiya qardışədə bə əməl omə zorinə hərəkəton bəpe təhğiğ bıkardo, dastqir bıə etirazkaron ozod bıko. Ey həmən Az.R hokumət dəvət kardəşe ki, de bəşəri huğuğon təminati əlağədar bəştə səpe peqətə ehdədarion bə vırə bırosno.

Çe Avropa Şura bə Bəşəri huğuğon dair Komissar Dunya Miyatoviç Boku polisi de numayişkaron bədə rəftor məhkum, hokumətən dəvət  kardəşe ki, polisi jıqo əməlon vəy bısəno, şəhrıvandon sərbəst qırd bıe huğuğon təmin bıko, bə inzibati cəzo məhkum bıə dincə etirazkaron çe zindono vado.

 Çe Human Rights Watch bəşəri huğuğon təşkilati bə Avropa və Asiya dair direktor Giorgi Gogia`n ım məzmunədə bəyanat doəşe, Boku hokumət dəvət kardəşe ki, bə ıştə ehdə peqətə təəhhudon əməl bıkardo.

Bə Repressiya və İşqəncəon Əleyh Komitə sədr huğuğə mudafiəkar Oqtay Quləliyevi ıştə “Fasebook” səhifədə nıvıştəşe ki, oktyabri 19-ədə devləti səviyyədə cinayət vağeə bıe. Şəhrıvandon ıştə Konstitusion huğuğonku istifadə karde cəhdi, əvonış polison tərəfo bə işqəncə, təhdid və təhğiron məruz oqəte. 300 nəfər dəstqir bıe. Çəvonədə 30 nəfər bə inzibatiə zindonə cəzo, kamiku 22 nəfərən bə 50 mənotiku tosə 500 mənot cərimə məruz mandin. “Azadlıq.info” dərc kardə ım bəyonatədə Quləliyev xəbə dodə ki, əvon bə hokuməti jıqo ğeyri-ğanuniə əməlon motijə nibəmanden, ım hərəkəton təhlil karde ro məşvərəton təşkil bəkarden.