Az.R-ədə onkoloji noxəşinon miğdar 2 kərə ziyod bıə

“The Lancet” jurnali orəxnə 10 sori əhatə kardə tədğiğati nəticəon bə oşko bekardəşe ki, dınyoədə xərçənqə noxəşinon miğdar sorbəsor ziyod bedə. Im tendensiya Az.R-kuən yan dəvardəni. “İslamazeri.com” sayt nıvıştedə ki, orəxnə 14 sorədə ım noxəşinon miğdar 2005-minə sori 23 həzoku, 2018-minə sori bə 48 həzo rəsə, yəni 2 kərəsən vey ziyod bıə.

Respublikadə jıqo noxəşinon bə devləti hisob mualicə karde ro vey penə fayədə səhiyyə şərait soxtə bıə. Milli Onkoloqiya Mərkəz bə dınyo standarton cəvob doə səviyyədə onoə bıə. “Azadlıq.info” sayti ım devlətə səhiyyə mualicəxonədə rışvəxorəti, doktoron bə noxəşinon munasibətədə qeyri-insonə hərəkəton ro doe, çəvon ğeyri-professionaləti barədə qıley məğalə dərc kardəşe. Məğalə muəllif ğeyd kardedə ki, hejo jıqo neqativə vəziyyəti səbinə har sor de 10 həzoon noxəşinon bo mualicə ro bə xariciə məmləkəton, əsasən bə İroni mərizxonəon və nodən. Çunki ım Onkoliqiya Mərkəzədə hic kəsi bepul mualicə kardedənin. Doktoron xidmətə pul, analizon ğıymət ce Avropa mərizxonəon səviyyədəy, əmo mualicə səviyyə xeyli sarue. Muəllifi nezə odəmonədə qıley boştə noxəşini mualicə ro 40 həzo mənot xarc kardəşe, əmo ey şifo peydo karde zınəşni.

Co qıley bə xərçənqi mubtəlo noxəşin Milli Onkoloqiyadə mualicə besəmər bıe səbəbiku bə Təbriz şe məcburiyyətədə mandə. Çəvrey Beynəlmilələ Mərizxonədə 2 manqnə mualicə nəticədə şifo peydo kardedə, və bımi ro çeyku həmməyəvo cəmi 14 həzo mənot xarc beşedə.

Respublika Milliə Onkoloqiya Mərkəzədə bə jiqo beaburinə vəziyyəti orəx doe ro, məğalə muəllif deştə çand qılə dustə ruşinəfikron bə Səhiyyə Vəzarəti muraciət kardedən. Əmo çəvon ım təşəbbusi hiç qıley effektış bedəni.

Əlavən bıvotəmon ki, çe Milliə Onkoloqiya Mərkəzi direktor çe Prezident İlham Əliyevi day Cəmil Əliyeve.