Huğuğə mudafiəkar Oqtay Quləliyev maşini jəşe.
Oktyabri 29-ədə huğuğə mudafiəkar Oqtay Quləliyev svetofori havzə ruşnədə roy piyodə dəvardə hissədə maşini jəşe. Çe ım hadisə video kəşemoni sosialə şəbəkəonədə muzakirə ey avtoğəzo ne, sui-ğəsd bıe fikr bə meydon vardəşe.
Oqtay Quləliyev Respublikadə qıley sandinə huğuğə mudafiəkare, Bə Repressiya və İşqəncəon Əleyh Komitə koordinatore. Boku hokuməti zorə strukturon tərəfo çand bəjəm bə təzjiğ və şantajon hədəf bıə, əmo əv ıştə qətə royku qardə ni, bə siyasiə və dini məhbuson munasibətədə polison , həmən zindonxonə rəhbəriyyəti doə işqəncə fakton bə cəmiyyəti nəzə rosniəşe, hokumətiku bə jıqo ğeyri-insonə əməlon orəx doe daima tələb kardəşe. “Azadi Radio” oktyabri 29-ədə Quləliyevi koordinasiya kardə Komitə qıley iclas dəvunie, və de “Bə işqəncon orəx bıdən” şuari 10 rujnə kompaniya bino karde barədə məlumat doəşbe. Ey bə Padio qəp jəşbe ki, “ orəxnə soronədə Azərbaycanədə de işqəncəon əlağədar şikayəton miğdar xeyli ziyod bıə. Çəvon Komitə bardə tədğiğaton 30 nəfərisə vey insoni devləti orğanon doə işqəncon nəticədə tələf bıe bə oşko bekardəşe. Im işqəncə tədbiron polisxonəonədə, zindononədə, hətto hərbi hissəonədə işra kardəşone. Çəmə bino kardə kompaniya məğsəd bə hokuməti bardə işqəncə siyasəti etiraz kardeye.”
Jıqo vəziyyətədə Respublika ictimaiyyət bə Quləliyevi sə omə ım ğəzo muxtəlif çur izah kardedə. Əsasə fikir çımədə ibarəte ki, noyabri 2 –minə ruji mitinği ərəfədə Əli Kərimli təhdid, ım mitinği təşkilatkaron dastqir, çe cəmiyyətiku təcrid karde fonədə bə Respublika ən fəalə huğuğə mudafiəkari sə omə ım hadisə avtoğəzo ne, hokuməti təşkil kardə sui-ğəsde. “Turan” İnformasiya Aqentiyyəti analitik Şahin Hacıyev, tədğiğatkarə jurnaılust Xədicə İsmayıl, “Tolerant” sosialə tədğiğatə mərkəzi sərdar Azər Rəşidoğlu və həniən co ictimaiə fəalon bə ım fikri tərəfdar beşən, Əliyev hokumət dəvət kardəşone ki, keşvərədə bə sosialə vəziyyəti qıvonin kardə əməlon rəvoc doe əvəzi çok əbi ki, de muxalifəti dialoq barde bino bıko, bə i co məmləkəti çe siyasi, həmən iğtisadiə behraniku bekardə roon muəyyən bıkon.
