Huğuğə mudafiəkaron Az.R-ədə siyasiə məhbuson tojə siyahi elan kardışone.
Az.R-ədə Siyasiə Məhbuson Azadi ro qıley İttifağ heste. Dəvardə rujonədə ey Respublika zindononədə siyasiə məhbuson tojə siyahi elan kardəşe. Siyahiədə 135 nəfəri nom heste.
“İslamazeri.com” bə “Turan”i istinadən xəbə dodə ki, sentyabrədə elan bıə siyahiədə 117 nəfəri nom hestbe. Çə vaxtiku 3 nəfəri cəzo muddət orəxə və əvon bə azadi beşən. İttifaği koordinator Elşən Həsənovi votəşe ki, Qəncə məhbusonədə 20 nəfər və AXCP uzv Paşa Umudov ki, oktyabrə manqədə de məhkəmə hukmi məhkum kardə bıən, bə siyahi daxil kardəşone.
Im 135 nəfər məhbuson bə 7 qrup co kardəşone. 6 nəfər jurnalist və bloqer, 7 nəfər muxalifə partiya uzvon, 3 nəfər MTN-i məhbuson, 1 nəfərən siyasiə qirove. Ən vey məhbus dindaron qrupədəy. 53 nəfər. Qəncə məhbuson bə əleydə qrup aid kardəşone, çəvon miğdar 51 nəfəre. Hərçənd ki, Qəncə hadisonən bənə Nardarani faciə çe hokuməti tərəfo bə dindaron divon qəte ro təşkil kardə fitnəkarə əməl bıe, huğuğə mudafiəkaron əvonşon bə co qrup aid kardəbənəbe, dini məhbuson miğdar 104 nəfər əbi. Bə nəzər bısənəmon ki, Yunis Səfərov və diqər 9 nəfər Qəncə məhbuson məhkəmə hələ orəxə ni, ehtimal heste ki, əvonən bə dırozmuddətinə zindonə cəzo məhkum bıbon, jəqo dini məhbuson miğdar 110 nəfərisən vey bənine.
Siyasiə Məhbuson Azadi ro İttifaği fəalonədə qıleyən Oqtay Quləliyev bıe. Isət əv bə avtoğəzo eqınie səbəbiku mərizxonədəy. Turkiyəku doktoron omən əv muayinə kardəşone, bə Turkiyə barde məsləhət zınəşone. Bə “Reporti” istinadən Quləliyev Heydər Əliyev fondi co kardə de məxsusi ambulansə həvopeyma bə İstambuli Acibadem klinika bardəşone. Çey mualicə xarcon Əliyev Fondi bəştə ehdə peqətəşe.
