De Oqtay Quləliyevi səhhəti qıvonin bıe əlağədar huğuğə mudafiəkaron bəyanat doəşone.

Noyabri 8-ədə de Bə Repressiya və İşqəncəon Əleyh Komitə kordinator Oqtay Quləliyevi səhhəti qıvonin bıe əlağədar ım Komitə uzvon de ictimaiyyəti numayəndon iştiraki qıley iclas dəvunişone, Quləliyevi de avtomobili je və mərizxonədə de çey mualicə əlağədar pınhonə məğamon muzakirə kardə bə peş de bəyonati bə respublika ictimaiyyəti muraciət kardışone.

“Qafqaz.ir” sayti bə əhandon təğdim kardə həmonə bəyanatədə əvon ğeyd kardəşone ki, Quləliyevi səhhət anədə qıvonine ki, çey bə Turkiyə barde məcburiyyət bə miyon beşə, turkiyəvojə doktoronən bə çey bəji mande 20% umid dodən. Əmo Nəsimi rayoni Polisə İdarədə de Cinayətə Məcəllə “beehtiyatinə səbəbiku bə zərərdidə şəxsi saleməti kam miğdarinə ziyan je” maddə cinayətə ko bino kardəşone. Imən bə jıqo avtoğəzo cinayəti adekvatə huğuğiə ğıymət ni.

Həmonə avtoğəzo video vindemoni beğərəzə təhlil oşko nişon dodə ki, ım adi ro-hərəkət ğaydon darışte nəticədə vağeə bıə ğəzo ne, çe ğəsto de odəmi kışte məğsədi təşkil bıə cinayətə əməle. Həməkəsən zınedə ki, Quləliyev beynəlxalğ miğyasinə sandinə huğuğə mudafiəkare. Əvşon çand bəjəm bə Sər Prokuratura və Daxili Koon Vəzarət vanq kardəşonbe, çey vədə tələb noəşonbe ki, ıştə ım fəaliyyətiku dast bıkəşo. Bə jıqo fakton, həmən hadiə video kəşemoni obyektivə nəticəon  qorə cinayətə ko de “bə ictimai xadimi jimoni sui-ğəsd” maddə bino karde lozime.

Komitə bəyon kardəşe ki, Oqtay Quləliyevi Təcili Tibbi Komək mərizxonədə sıftənə muayinə nəticəon çe peşonə “City Nospital” mərizxonəku niyo karde təsaduf ni, çimi peştədə ğəsdinə əməl mandedə. İstintağ mutləğ bəpe ım fakti təhlil bıkardo. Həmən çe DKV-ku tələb kardedə ki, çe Quləliyevi və həmonə ranəndə ğəzoku 1 saat bə navonə telefonə qəpon bo cəmiyyəti oşko bıko, istintaği qardışədə əvoni bə nəzə bısəno.

DKV mətbuatə xidməti isə  ım avtoğəzo barədə doə məlumatədə votə bedə ki,  ğəzoədə qınokar iqlə ranəndə ni. Quləliyeviən səhlənkarəti kardəşe, roy ovaşteədə de telefoni qəp jəşe.