Tırkiyə Amerkə senat məclisədə Ermənion qenosidi rəsmi bey məhkumış karde.

Bə İrna raporti əsos Tırkiyə prezident aparati sıxənəvot ımruj sıb, Amerkə senat məclisədə həminə loyhə təsdiğ bey be əsos və be nəticə ko bə hisobış varde və votışe: ım be əsərə loyhə hiç sahədə Tırkiyə həxinə zumandə nəzər iyən siyasi, hərbi və iğtisodi siyasətonədə təsir kardedə ni.

İbrahim Kalin çı Amerkə senat parlamenti ım ğəroli bə qədə siyasi mənafe bə dast varde xoto çəvon nadırıstə famemoni zınəş be.

Tırkiyə xarıci vəzir Movlud Çavoş Oğlo həm Amerkə ım ko qıləy siyasi nımoyiş bə hisobış varde və votışe: jıqonə ğətnomə ya ğanun hiç eteboş ni.

Im qılə hoədəy ki Ermənistoni i minə vəzir Nikol Paşiniyan, Osmani dıvləti zəmonədə bıə Ermənion qınosid faciə rəsmi zıney xoto Amerkə senat parlamenti ım ko bə təğdiri loyiğ bə hisobış varde və ım ğanuni bənə ədalət və həğiğəti səbarzəti zınəş be.

Isət Tramp detosə 10 ruj fırsətış heste ki ım ğəroli təsdiğ ya xot rədd ko.

Erməniston vey faxte ki elan kardedə Tırkiyə Osmani emperya zəmonədə i milyon və 5 sa həzo Erməni Tırkon tərəfo ğətliam, zindoni və ya xot də bə dər bıən, ım iddio həmişə Tırkiyə tərəfo rədd bıdə.