Nardarani Sipirişon Şura sədri məhkəmə bino bedə
Yanvarə manqi 10- minə ruji Boku qonə cinayəton məhkəmədə Nardarani Sipirişon Şura sədr Natiğ Kərimovi mühakimə bino bənine. Azərbaycan İslamə Partiya sədri navkonə müavin İnğilab Əhədovən dey bə ico mühakimə bəbe. Kərimovi bə devləti xəyanətədə, Əhmədovi isə bo xarici devləti casusətiədə ittiham kardedən.
Ğəfğaz Mısılmonon İdarə navqonə şebə müdir ilahiyyatçi Elşən Mıstəfooğli mühakimən bə orəx rəsə. Məhkəmə əvış bə devləti xəyanətədə mığəssir zınə və bə 10 sornə zindonə cəzo məhkum kardəşe. Bı barədə "Hədəf 14.az" sayti xəbə doəşe.
Dekabri 30-ədə Mısılmonon İbemonə Hərəkati sədri müavin Elçin Ğasımov və çey 11 nəfər həmməsləkon mühakimə bino bıə. Ğasımovi votəşe ki, ım məhkəmədə əmə sübut bəkamon ki, çəmə hiç qliey qıno nimone. Vəkilon məhkəmədə xeyli vəsadət ros kardəşone, əmo hakimi əvon təmin kardəşni. Proses yanvari 13-ədə dəvom kardənine.
Taleh Bağırzadə və çey 17 nəfər həmməsləkon mühakiməən bə orəx rəsedə. Prokurori ey bə umri dırozi zindonə cəzo məhkum karde tələb kardəşe. Bağırzadə bə Meydan TV müxbiri votəşe ki, çəmə zindonədə mande müddət ım hakimiyyəti umri qədərədə bəbe. Rə -di ım hokumət süğut bəkarde və əmə bə azadi bebəşemon.
"Azadlıq.info" saytən İlham Əliyevi "Bəylər" məçiti obemonə mərasimi bəpeştə de məşo bə məcit daxil be həxədə çe Taleh Bağırzadə fikri nıvıştəşe ki, perzidenti ım hərəkət islam dini və çəmə milli-mənəvi molyəton təhğir kardeye.
