Az.R-ədə Parlamentə entexabati 1-minə mərhələ bə orəx rəse.
Dəvardə sori dekabrə manqi 2-ədə Az.R Parlament, yəni Milliə Məclisi ıştəni vadoe barədə ğəror ğəbulış karde. Tojə Milliə Məclisi vıjniə ruj bə fevrali 9 təyin kardışone.
Çə vaxtnəku bə tojə Parlamentə entexabaron hozoəti mərhələ bino bıe. Dəvardə rujonədə Mərkəzi Vıjniə Komissiya elan kardışe ki, yanvari 17-ədə entexabati namizədon bə ğeyd sə mərhələ bə orəx rəsə. Məlum bıə ki, 2431 nəfəri ıştə namizədəti bə nav doe ro muraciət kardəşe. Çəvonədə bə 2358 nəfəri bo imza qırd karde ro vərəğə doəşone. 1560 nəfəri namizədəti rəsmən təsdığ bıə və əvonşon bə vıjniə kompaniya vadoə. Əmo çəvon 18 kəsi ıştə namizədəti bə dumo peqətəşe. 1542 nəfər 125 qılə deputatə mandati bə dast varde ro mubarizə bəbarden. Bə ım proses 19 qılə partiya umjən qıniə. Ən vey , yəni 123 qılə namizəd Tojə Azərbaycanə Partiya bə nav doəşe. Musavat Partiya de 64 nəfəri, REAL İttifaği de 31 , “Umid” de 21, “Hərəkət Vıjniə Blok” de 16, “Ana Vətən” de 14, Demokrat Partiya de 10, Milli İstiğlal de 9, Muasir Musavat de 5 namizədi bə vıjniəyon umjən qıniən.
Entexabati təbliğat-təşviğatə mərhələ 21 ruj, tosə fevrali 8-minə ruji orəxi dəvom bəkarde.
Vıjniəyon Monitorinq və Demokratiya Tədrisə Mərkəzi Az.R-ədə vəomə parlamentə entexabati 1-minə mərhələ barədə ıştə hesabat bəyon kardəşe. Bə “Turan” informasiya Aqentiyyəti bı barədə doə məlumati əsasən, hokuməti ım vıjniəyon ərəfədə demokratikə fəaliyyəton səpe noə məhdudiyyət və ğədəğəon çe arə penıqətışe, çe Avropa Əmniyyət və Həmkarəti Təşkilati, bəşəri Huğuğon Buro və Avropa Şura Venesiya Komissiya bahəm hozo kardə məsləhəton bə nəzə nısəşe. Vıjniə Komissiya Hakim Tojə Azərbaycanə Partiya bə nav doə 123 namizədon həmmə bə ğeyd səşe, əmo diqər 18 qılə partioyon namizədon xeyli hissə bə entexabaton vanıdoşe.
Avropa Parlamenti bə jıo neqativə vəziyyəti qorə ım entexabaton muşahidəku imtina kardışe, və ım tədbiri bəştə həmə uzvon mustəğil surətədə muşahidə kardeyən məsləhət nıznışe. Demiən Az.R -ədə vəomə parlamentə entexabaton leqetiməti bə suali ji dəğandışe.
