Azərbaycan Ğida Əmniyyətə Aqentiyyət ıştə vəzifə icra karde zınedəni.

Az.R Prezident İlham Əliyevi 2017-minə sori noyabrə manqədə məmləkəti ticari devriyyədə bə ərzaği tərkibi nəzarət karde, de ım roy bə əhali ğida əmniyyəti tənəvəc mande məğsədi Ğida Əmniyyətə Aqentiyyət onoe barədə fərman doşe.

Isət ım təşkilati 75 nəfəro ibarət ştat çe devləti budcəku maaş sedə. Əmo çey foydəninə koy əmsal bə noli bərobəre. Respublika əraziədə əhali çe ım təşkilati onoeku bə nav çoko çe ğidaku zəhrəlud bedəbe, həmonə vəziyyət ısətən dəvom kardedə. Məmləkəti Mass-mediyadə dərc bıə xəbəonku məlum bedə ki, jıqo fakton orəxnə soronədə hətto xeyli vey bıə. “Sputnik Azərbaycan” sayti Nuə sori ərəfədə xəbə doşe ki, Boku iaşə muəssisonədə viski peşome nəticədə xeyli odəm zəhrəlud bıə. Respublika Ğida Əmniyyətə təşkilati sərdar Ğoşğar Təhməzli ım fakt təsdiğ kardışe, votışe ki, zəhrəludə hadisəon 13 nəfər əhatə kardəşe, çəvonədə 4 nəfər mardə, 1 nəfərən vində ğabiliyyətiku məhrum bıə. Təhməzli çanədə ğərib-curən bıbo əhali dəvət kardışe ki, “əvon ıştən bə ğida keyfiyyəti nəzarət bıkardon”. Bə iaşə muəssiə rəhbəronən çəşnavi doşe ki, “ıştə məsuliyyəti dərk bıkon, xariciə turiston vədə bə məmləkəti imici  sarı eğandə hərəkəton ro nıdon”.

Peş Nuə sori “Bizim Market” şəbəkə mağazinonədə 12 ton soxtə ruən bə oşko beşə vaxtonədən ım Aqentiyyəti rəhbəri ıştənış sənibəton ğeyri adekvat barde, votışe ki, bı məsələdə çey rəhbərəti kardə Ğida Əmniyyətə təşkilati qıno nişe. Jıqo fakton cinayətə əməlin və dəvon huğuğə muhafizə orğanon bəpe məşğul bıbon.

Imən bə cəmiyyəti çok məlume ki, xariçi ticarət çe hakim toyfə tam inhisari jitonoe. Bə Respublika idxal bıə ərzaq və ğida məhsulon həmə iqlə monopolistə şirkət vardedə, əvən bə Prezidenti ailə nezə odəmon məxsuse. Bə keşvər befərə, vaxtış dəvardə məhsulon vardə əməlon soyb məhz ım odəmonin. Bənə Ğoşğar Təhməzli və bənə Azərbaycani Ğida Əmniyyətə Aqentiyyəti çanədə vəzifədaron və təşkilaton cəhd bıkonən bə əhali zəhərinə ğida erutə fakton vəy se mumkun nibəbe, ta ki, prezident Əliyev ıştən çe jıqo cinayətə əməlon vəy se ro konkretə qəmon şonıdo.