Çe MKİ sabiğ zabiti Ukrayna həvopeyma suğuti səbəbon barədə votəyon.
Çe Tehrono bə Kiyev pərə sərnişinə həvopeyma çe İroni Həvo Həmləonku Mudafiə ğıvvon tərəfo səhvən je məsələ hələən çe dınyo mutəxəssisə təhlilqəron diğğətədəy.
Amerika Mərkəzi Kəşfiyyatə İdarə sabiğ zabit Filipp Ciraldi American Gerald Tribune rujnomədə dərc bıə məğalədə nıvıştedə ki, Ukrayna ım ıştənpəri suğuti əsasə səbəb Amerika tərəfo çey bə radioelektron həmlə məruz mandeye. Ciraldi İroni raket kompleksi operatori efirədə maneon beku şikayət karde, raketə həmləku bə nav Ukrayna layneri transponderi həmuş bıe və çey de dispetçeri rabitə ğət bıe, həmonə ləhzədə həmən de İroni Həvo Həmləonku Mudafiə ğərərqohi rabitədən problemon bə əməl ome hiçən təsaduf hisob kardedəni. Əv həmən votəşe ki, Ukrayna həvopeyma suğut navədə hozo bıə məkrinə provakasiya bıe ki, bı koədə İroni de mığəssir zıne roy İbə Ştaton çəvrey hokuməti mevğe zəif eğando və ey peqordıno.
Rusiya Xarici Koon Vəzir Serqey Lavrovən ıştə mətbuatə konfranson qıleyədə ğeyd kardışe ki, Ukrayna “Boinq”i suğutiku bə nav İroni marzi nezonə həvo məkanədə çe Amerika 6 qılə F-35 ıştənpər cevlan kardedəbe. Çe İbə Milləton Təşkilati Sər katib Antonio Quterreşən Sər Assambleyadə ıştə nitğədə bəşəriyyəti bə “Ğıyomətə ruji” tərəf hərəkət karde votışe, çimi əsasə səbəbonədə qıleyən insonon tojə elektronə texnoloqiyaku cinayətə əməlon bə jimon dəvunie ro istifadə kardeədə vindışe.
“İran.ru” sayt xəbə dodə ki, çe Rusiya Senati vitse-spiker İlyas Umaxanov de İroni Rusiyadə səfir Kazem Cəlali didorədə ğeyd kardəşe ki, Rusiya beynəlxalğə səviyyədə bə İroni mevğe dastək bədo.
Şanxay Həmkarəti Təşkilatədə çe Rusiya Prezidenti numayəndə Bəxtiyar Hakimovi bəyon kardəşe ki, ım təşkilati uzv devləton İroniən bey daxil bıe tərəfdarin. Serqey Lavrovən ım fakt təsdığ kardəşe. Əlavən votəşe ki, bə Şanxay Həmkarəti Təşkilati daxil bıə devləton sərdaron bə 9 May Ğələbə ruji idə tədbir dəvət kardəmone, və əvon həmə bımi musbət çəvob doəşone.
