Az.R səhiyyə sistemədə beabruniə vəziyyət.

Az.R Kutləviə İnformasiya Vasitəon ə ruj bedəni ki, məmləkəti səhiyyə muəssisəonədə ocizonə vəziyyətiku xəbə nıdon.

Yanvari 25-ədə “Nur-az.com” sayti xəbə doşe ki, Bokuədə bə qıley 4-minə sinifi şagirdi sıpə ğıç jəşe. Əv bə mərizxonə bardəşone, əmo sıpə ğoduz bıe səbəbiku doktoron həmonə hırdəni jimoni xilas karde zınəşon ni.

Yanvari 24-ədə Meydan TV noxəşin Tariyel Əliyevi problemiku nıvıştışe. Ey dee bə Səhiyyə vəzarəti muraciət vığandəşe, əmo bey komək kardəşon ni. Əliyevi bə muxbiri votəşe ki, qirəm bımardo, çey qıno çe məmləkətədə mevcud bərbodə səhiyyə sistemi səpe, şəxsən səhiyyə vəziri qiyədə bəmande.

Həmonə ruji Meydan TV Sabirabad Rayoni Mərkəzi Noxəşxonə dializə noxəşinon zəhrəlud bıe həxədə bə cəmiyyəti xəbə rosnişe. Sayti muxbiri bı bardə tədğiğat bardəşe, əmo ım hadisə səbəb bə oşko bekarde zınəş ni. Nə həmonə mərizxonə doktoron, nəən Tibbi Muəssisəon İdarəkardə İbemoni mətbuatə xidmətədə bımi konkret cəvob doəşon ni.

 Cand ruj bə nav “Baku.vvs” sayti Qəncədə vağeə bıə qıley ğəziyyəku cər jeşe. Şəhəri əji Laləzar Məmmədova 5 manq bə nav cərrahiyyə əməliyyat bıə. Məvotbən doktoron çey dılətonədə ğeyçi oqətəşonebən. Şəhəri həmonə noxəşxonə sər doktori muavini ım fakt təsdiğ kardəşe, votəşe ki, Məmmədova sənibəton əməliyyat kardəşone, ğeyci çey dılətoniku bekardəşone, bə ım xəto roo doə səhiyyə həmkaron tanbeh kardəşone, cəşnavi doəşone ki, bə jıqo ğələti həni ro nıdon.

Sivil devləton çe əhali tibbi problemon de icbari tibbi sığorta xidməti tətbiği roy həll kardəşone. Az.R-ədə Prezident İlham Əliyevi dee 2007-minə sori sərəncam doşe, və bə İcbari Tibbiə Sığorta aid Devlətə Aqentiyyət onoşone. Nəhayət Boku hokumət ımsor bə ğəror omə ki, Respublika həmə əraziədə İcbari Sığorta Xidməti tətbiğ bıkardo. Im Aqentiyyətiku bə “Sputnik Azərbaycani” məlumat doəşone ki, ımsori dırozi tibbi sığorta de 4 mərhələ respublika həmə rayonon əhatə bəkarde.

Hokuməti ım təşəbbus kom nəticəon bədo, əv bo sori orəxi məlum bəbe. Hələ ki, cəmiyyəti ə veynə hissə ki, tibbiə xidməti  avjor karde ro pulə imkaniku məhrume, bə xıdo pənoh bardedə, həmən bə hokuməti ım təşəbbusi de yolə umu diə kardedə.