Boku hokuməti de koronavirusi əlağədar vində tədbiron.
Cinədə qley tojə virus bə əməl omə, əv insonon bə zıkomə noxəşi mubtəlo kardedə. Isət çe ım noxəşiku mardə odəmon miğdar 100-sən dəvardə. Bənə dınyo co devləton, Boku hokuməti muvafiğə təşkilatonən de ım problemi əlağədar navdəğandə tədbiron vindedən.
Yanvari 28-ədə Vəziron Kabinetədə muşavirə təşkil bıe. Im virusi bə məmləkət daxil bıe vəy se ro ğəror doşone ki, marzi ovaştə məntəğəonədə bə zumandə koə rejim ovaştə; Çiniku omə odəmon mutləğ tibbi muayinəku dəvuniə və peşonə vaxtonədə əvoni tibbi nəzarəti jitono oqətə; virusə ehtimalinə ərzağ məhsulon həvatə muəssisə və vıjoronədə sanitar nəzarəti zumand kardə; səhiyyə muəssisəonədə qılvoniə rabitə lunə - yəni "qaynar xətt" təşkil kardə; de ım virusi əlağədar əhali arədə maarifinə təbliğaton bardə bıbo.
Bə Səhiyyə vəzir Oqtay Şirəliyevi doə əmri əsasən, Sipiəciqəri Noxəşion Mərizxonədə 8 qılə məxsusi palata hozo kardəşone, digər tibbi muəssisəonədə sanitariya-qiqiyenik tədbiron bə jimon dəvuniəşone. Səhiyyə Vəzarəti və Devlətə Kemruqə Komitə mutəxəssison bahəm fəaliyyət bino noəşone. Respublika Qiqiyena və Epidemoloqiya Mərkəzi direktori muavin Afağ Əliyeva bə ictimaiyyəti məlumat doəşe ki, Səhiyyə Vəzarəti de Kemruqə Komitə sıft əlağə təşkil bıə, hələ ki, bə koronavirusi mubtəlo bıə noxəşin bə oşko bekardəşon ni.
Meydan TV bə Umumdınyo Səhiyyə Təşkilati doə məlumati əsasən xəbə doəşe ki, 2019-minə sori dekabrə manqədə Çini Vuhan şəhərədə pnevmoniya mərəzi bə əməl vardə naməlumə koronavirus iminə kərə bə oşko beşə. Tosə yanvari 27-minə ruji ğeyrəz Çini çe dınyo 13 qılə keşvərədə 4 həzo 515 nəfəri bı virusi mubtəlo bıe, çəvonədə 106 nəfəri marde bə ğeyd səşone. Cinıjə təbibon votedən ki, virusi inkubasiya mərhələ 3 rujiku tosə 12 rujie. Əmo mubtəlo bıə iminə rujiku sirayət kardə xususiyyət hestışe, bə səbəbən bey mubtəlo bıə noxəşini rəbədə muəyyən karde çətin bedə.
